នៅក្នុងដំណើរទស្សនកិច្ចផ្លូវការ និងមិត្តភាពរយៈពេល៤ថ្ងៃនៅកម្ពុជា ឯកឧត្តម អំ បឺរឡា (OM BIRLA) ប្រធានសភាជាន់ទាប នៃសាធារណរដ្ឋឥណ្ឌា ក៏បានធ្វើដំណើរមកទស្សនកិច្ចនៅខេត្តសៀមរាប ដោយបានទៅទស្សនា ប្រាសាទតាព្រហ្មនិងប្រាសាទអង្គរវត្ត និងបានចាកចេញពីខេត្តសៀមរាបនៅថ្ងៃទី២៤ខែមេសាឆ្នាំ២០២២។
នៅក្នុងដំណើរទស្សនកិច្ចនៅខេត្តសៀមរាប ឯកឧត្តម OM BIRLA ប្រធានសភាជាន់ទាបឥណ្ឌា មានប្រសាសន៍ថា ទំនាក់ទំនងកម្ពុជា-ឥណ្ឌា ទាំងវប្បធម៌ និងប្រវត្តិសាស្ត្រ គឺមានអាយុកាលជាង១សហសវត្សមកហើយ ជាក់ស្តែងភស្តុតាងបញ្ជាក់ច្បាស់ គឺប្រាសាទសំបូរព្រៃគុក និងប្រាសាទអង្គរវត្ត ដែលមកដល់ពេលនេះបានក្លាយជាទីតាំងដ៏ចំណាស់បំផុត នៃវប្បធម៌ និងសាសនាឥណ្ឌា និងប្រទេសកម្ពុជា។
ឯកឧត្តមបញ្ជាក់ថា ទំនាក់ទំនងមិត្តភាពកម្ពុជា-ឥណ្ឌាអាចនិយាយបានថា ជាទំនាក់ទំនងអរិយៈដែលបានរក្សា និងពង្រឹងចំណងមិត្តភាពរវាងប្រជាជនកម្ពុជា និងប្រជាជនឥណ្ឌាបានល្អ។ ឯកឧត្តមបានជំរុញឱ្យឯកអគ្គរដ្ឋទូតនៃសាធារណរដ្ឋឋឥណ្ឌាប្រចាំកម្ពុជា បន្តសហការល្អជាមួយរាជរដ្ឋាភិបាលកម្ពុជា ក្រសួង និងស្ថាប័នពាក់ព័ន្ឋ និងអាជ្ញាធរខេត្តសៀមរាប ក្នុងការពង្រឹងទំនាក់ទំនងការទូតឱ្យកាន់តែល្អថែមទៀត ឱ្យសមជាប្រទេសបងប្អូនមានអារ្យធម៌និងវប្បធម៌ស្រដៀងគ្នានេះ កាន់តែរឹងមាំថែមទៀត។
ឯកឧត្តម ទៀ សីហា អភិបាលខេត្តសៀមរាប ក៏បានថ្លែងអំណរគុណចំពោះរដ្ឋាភិបាល និងប្រជាជន នៃសាធារណរដ្ឋឥណ្ឌា ដែលជានិច្ចកាលតែងតែបានផ្តល់ជំនួយក្នុងការស្តារ និងអភិវឌ្ឍន៍មាតុភូមិកម្ពុជា ឱ្យមានការរីកចម្រើនលើគ្រប់វិស័យ និងគាំទ្រទាំងនយោបាយ ព្រមទាំងវិស័យការទូត ឯករាជ្យភាព សន្តិភាព អធិបតេយ្យភាពជាតិ និងការបង្រួបបង្រួមជាតិនៅកម្ពុជា គ្រប់កាល:ទេស:ទាំងអស់។
ទន្ទឹមនឹងនោះរដ្ឋាភិបាលឥណ្ឌា បានជួយឧបត្ថម្ភលើវិស័យមួយចំនួន រួមមាន ការផ្តល់វ៉ាក់សាំងការពារជំងឺកូវីដ-១៩ ជូនដល់រាជរដ្ឋាភិបាលកម្ពុជា សម្រាប់ចាក់ជូនប្រជាពលរដ្ឋ ការងារជួយឧបត្ថម្ភលើសាលាក្ដីខ្មែរក្រហម ការងារជួសជុលប្រាសាទអង្គរវត្ត ប្រាសាទតាព្រហ្ម ការសាងសង់សារ:មន្ទីរវាយនភណ្ឌ ក្នុងខេត្តសៀមរាប និងជួសជុលប្រាសាទព្រះវិហារ ស្ថិតក្នុងស្រុកជាំក្សាន្ត ខេត្តព្រះវិហារ ព្រមទាំងវិស័យជាច្រើនទៀត៕
