សមិទ្ធផលផ្លូវថ្នល់៣៨ខ្សែក្នុងក្រុងសៀមរាបកំពុងជំរុញសន្ទុះនៃដំណើរការអភិវឌ្ឍលើគ្រប់វិស័យ

ប្រជាពលរដ្ឋរស់នៅក្នុងខេត្តសៀមរាបបង្ហាញថា ផ្លូវ ថ្នល់៣៨ខ្សែដែលបានស្ថាបនារួចរាល់ ពិតជាបានផ្តល់អត្ថប្រយោជន៍ជាច្រើន និងងាយស្រួលធ្វើដំណើរ ជាពិសេសសម្រាប់ការអភិវឌ្ឍនានា លើគ្រប់វិស័យ ហើយសូមឱ្យមានការចូលរួមថែរក្សាសណ្តាប់ធ្នាប់ និងអនាម័យទាំងអស់គ្នា។ អ្នកយកព័ត៌មានយើងប្រចាំខេត្តសៀមរាបធ្វើសេចក្តីរាយការណ៍! គម្រោងស្ថាបនាហេដ្ឋារចនា សម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប បានបញ្ចប់ជាស្ថាពរតាំងពីថ្ងៃទី២៩ ខែធ្នូ ឆ្នាំ២០២១មក និងគ្រោងសម្ពោធដាក់ឱ្យប្រើប្រាស់ជាផ្លូវការក្នុងពេលឆាប់ៗខាងមុខនេះ ធ្វើឱ្យប្រជា ពលរដ្ឋរស់នៅក្នុងខេត្តសៀម រាប បង្ហាញសេចក្តីពេញចិត្ត ចំពោះសមិទ្ធផលដ៏ថ្លៃថ្លានេះ។ កញ្ញាឈឿង អានឈី ប្រជាពលរដ្ឋរស់នៅក្នុងក្រុងសៀមរាប បានលើកឡើងថា ក្រោយពេលការស្ថាបនារួច រាល់នូវផ្លូវថ្នល់ចំនួន៣៨ខ្សែ បានធ្វើឱ្យការធ្វើដំណើរទៅមករបស់ប្រជាពលរដ្ឋទូទៅ មានភាពងាយស្រួលជាងពេលមុន មិនកកស្ទះ មានភ្លើងសញ្ញាចរាចរណ៍ មានគំនូសសញ្ញាចរាចរណ៍ច្បាស់លាស់ និងបំពាក់កាមេរ៉ាសុវត្ថិភាព ជាពិសេសបង្កើនសម្រស់ដល់ក្រុងសៀមរាប កាន់តែស្រស់ស្អាតទ្វេឡើង។ កញ្ញាបន្តថា ក្នុងនាមប្រជាពលរដ្ឋមួយរូប សូមថ្លែងអំណរគុណប្រមុខរាជរដ្ឋាភិបាល ដែលបានយកចិត្តទុកដាក់ សម្រាប់ការអភិវឌ្ឍខេត្តសៀមរាប ផ្តល់នូវសមិទ្ធផលផ្លូវដ៏វិសេសវិសាលនេះមកដល់ក្រុងសៀមរាប។ សំឡេង៖ខ្ញុំសង្កេតឃើញថាវាស្អាតជាងមុន រាប់រយជាងមុន និងមានភាពងាយស្រួលជាងមុន ដល់ពេលគេធ្វើហើយអ៊ីចឹងស្រឡះ ហើយគំនូសអីច្បាស់ៗ គួរតែចតឱ្យបានត្រឹមត្រូវ រៀបរយ និងជួយថែរក្សាផ្លូវ គួរឱ្យចូលចតតាមចំណត អរគុណរាជរដ្ឋាភិបាលដែលបានជួយកសាងផ្លូវឱ្យមានភាពងាយស្រួលជាងមុននិងធំទូលាយជាងមុន។ ចំណែកលោករាជ្យ ជីវន្ត អាយុ១៩ឆ្នាំ រស់នៅឃុំកណ្តែក ស្រុកប្រាសាទបាគង បានឱ្យដឹងដែរថា ក្រុងសៀមរាបបច្ចុប្បន្នកាន់តែមានភាពស្រស់ស្អាតជាងមុន ក្រោយពេលផ្លូវថ្នល់ទំាង៣៨ខ្សែបានកសាងរួចរាល់ ធ្វើឱ្យអ្នកទេសចរកាន់តែចង់មកកម្សាន្តក្នុងខេត្តសៀមរាបច្រើនជាងមុន ហើយជីវភាពប្រជាពលរដ្ឋកាន់តែល្អប្រសើរពីមួយថ្ងៃទៅមួយថ្ងៃ។ លោកបន្តថា ទន្ទឹមនឹងភាពស្រស់ស្អាតទាំងនេះ ប្រជាពលរដ្ឋគួរចូលរួមចំណែកក្នុងការថែរក្សាផ្លូវថ្នល់ទាំងនោះ ដោយចូលរួមគោរពច្បាប់ដែលអាជ្ញាធរបានដាក់ចេញ ការទុកដាក់សំរាមឱ្យត្រឹមត្រូវ ជាពិសេសការថែរក្សាសណ្តាប់ធ្នាប់សាធារណៈ តាមរយៈការចតយានយន្ត និងការលក់ដូរឱ្យមានរបៀបរាបរយជាដើម។ សំឡេង៖ការធ្វើដំណើរងាយស្រួល ទី២ដីតាមជាយក្រុងឡើងថ្លៃ ខាងអចលនៈទ្រព្យ ហើយការអភិវឌ្ឍន៍នៅសៀមរាបកាន់តែប្រសើរឡើង វាល្អសម្រាប់ខេត្តសៀមរាបបានធ្វើផ្លូវស្អាតអ៊ីចឹង បាទរំពឹងព្រោះអីឥឡូវផ្លូវធ្វើស្អាតហើយកូវីដឥឡូវចាប់ផ្តើមប្រសើរឡើងជាងមុន បើសិនជាផ្លូវស្អាត ផ្លូវស្រួលជិះយើងកុំជិះលឿន ត្រូវគោរពច្បាប់ចរាចរណ៍ គោរពសិទ្ធិអ្នកដទៃ ហើយមិនចោលសំរាម ផ្លូវដែលស្អាតហើយជួយអភិរក្ស ជួយថែរក្សាផង ហើយការចតយានជំនិះពេលផ្លូវធ្វើហើយអ៊ីចឹង គេត្រូវតែមានកន្លែងឱ្យយើងចត យើងមិនត្រូវដាក់ម៉ូតូរញ៉េរញ៉ៃទេ ពេលខ្លះគេហាមតែគាត់នៅតែធ្វើ នៅបំពាន អ៊ីចឹងសំណូមពរឱ្យគាត់ព្យាយាមគោរពតាមគោលការណ៍ដែលគេប្រាប់ផង ពេលខ្លះគាត់ទៅលក់លើចិញ្ចើមផ្លូវ គេជិះមកអាចប៉ះពាល់ អាចមានគ្រោះថ្នាក់ទាំងគេ ទាំងគាត់ ខាតពេលខាតប្រយោជន៍ ខ្ញុំសំណូមពរដល់ប្រជាពលរដ្ឋយើងឃើញកន្លែងស្អាត កន្លែងអភិវឌ្ឍន៍គួរតែចូលរួមថែរក្សា និងគោរពតាមគោលការណ៍ ដើម្បីឱ្យប្រទេសយើងក៏ដូចជាខេត្តយើងកាន់តែរីកចម្រើន កុំឱ្យគេមកពីក្រៅគេឃើញប្រទេសកំពុងអភិវឌ្ឍន៍ហើយ មនុស្សមួយចំនួនអត់គោរពតាមគោលការណ៍។ គួរជម្រាបផងដែរថា គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ខេត្តសៀម រាប ចំនួន៣៨ខ្សែ នេះ មានប្រវែងសរុប ១០៦គីឡូម៉ែត្រ ប្រើប្រាស់ថវិកាជាតិសរុបប្រមាណជាង ១៤៩លានដុល្លារអាមេរិក ដោយក្នុងនោះចំនួន៩លានដុល្លារអាមេរិក ចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ស្ថិតក្រៅគម្រោងសាងសង់ខ្សែផ្លូវទាំង៣៨នេះ ចំណាយពេលសាងសង់ ចំនួន១៣ខែ ដោយត្រូវបានបើកការដ្ឋានសាងសង់ កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕