អនុប្រធានទី២ព្រឹទ្ធសភា ណែនាំឱ្យបេក្ខជនជ័យលាភីអាហារូបករណ៍ទៅសិក្សានៅប្រទេសអូស្ត្រាលី ត្រូវខិតខំរៀនសូត្របង្កើនសមត្ថភាព ដើម្បីបន្តវេនសម្រាប់ប្រទេសជាតិ

ភ្នំពេញ÷អនុប្រធានទី២ ព្រឹទ្ធសភា ណែនាំឱ្យបេក្ខជនជ័យលាភីអាហារូបករណ៍ទៅសិក្សានៅប្រទេសអូស្ត្រាលី ត្រូវខិតខំរៀនសូត្របង្កើនសមត្ថភាព ដើម្បីបន្តវេនសម្រាប់ប្រទេសជាតិ ខណៈដែលរាជរដ្ឋាភិបាលត្រូវការយុវជនចូលរួមចំណែកក្នុងការអភិវឌ្ឍប្រទេសជាតិឱ្យមានការរីចម្រើនដូចបណ្តាប្រទេសនានានៅលើពិភពលោក។ ក្នុងឱកាសអនុញ្ញាតឱ្យប្រតិភូបេក្ខជនជ័យលាភីអាហារូបករណ៍រដ្ឋាភិបាលអូស្ត្រាលីចំនួន២២នាក់ ចូលជួបសំដែងការគួរសម និងទទួលអនុសាសន៍ មុននឹងចេញដំណើរទៅបន្តការសិក្សានៅប្រទេសអូស្រ្តាលី ឆ្នាំ២០២២ នាព្រឹកថ្ងៃទី០៣ ខែកុម្ភៈនេះ នៅវិមានព្រឹទ្ធសភា ឯកឧត្តមកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា នៃព្រះរាជាណាចក្រកម្ពុជា បានផ្តាំផ្ញើដល់ក្មួយៗទាំងអស់ ត្រូវចេះថែរក្សាកិត្តិយសប្រទេសជាតិយើង ត្រូវខិតខំរៀងសូត្រទោះបីយើងសិក្សានៅសាលាខុសៗគ្នាក៏ដោយ ត្រូវចេះជួយគ្នា អប់រំ ផ្តល់ដំបូន្មាន និងសាមគ្គីគ្នាទៅវិញទៅមក ត្រូវគោរពវិន័យរបស់សាលា គោរពលោកគ្រូ អ្នកគ្រូដែលផ្តល់ចំណេះដឹងឱ្យយើង ដើម្បីវិលត្រឡប់មកវិញជួយកសាង និងអភិវឌ្ឍន៍ប្រទេសជាតិយើងវិញ។ ឯកឧត្តម បានបញ្ជាក់ថា នៅពេលក្មួយៗទៅសិក្សានៅប្រទេសអូស្ត្រាលី ត្រូវក្តាប់ឱ្យបាននូវគោលនយោបាយរបស់រាជរដ្ឋាភិបាល ដែលបានដាក់ចេញក្នុងការអភិវឌ្ឍប្រទេសជាតិគឺ មនុស្ស ផ្លូវ ទឹក ភ្លើង ដែលអត្ថន័យថា ទី១មនុស្ស សំដៅលើការបណ្តុះបណ្តាលធនធានមនុស្ស ដែល រាជរដ្ឋាភិបាលតែងតែគិតគូរបង្កើតឱ្យមានសាលារៀនគ្រប់ទីកន្លែង ក្នុងនោះតម្រូវឱ្យក្នុងឃុំនីមួយៗត្រូវមានអនុវិទ្យាល័យ ដើម្បីផ្តល់ឱកាសឱ្យក្មួយៗនៅតាមជនបទ មានឱកាសបានសិក្សារហូតដល់ថ្នាក់មហាវិទ្យាល័យ។ ទី២ ផ្លូវ គឺជាការងារអទិភាពទី២ ដែលរហូតមកដល់ពេលនេះ ប្រទេសយើងមានផ្លូវគ្រប់ទីកន្លែងទាំងអស់ ជាពិសេសផ្លូវនៅតាមតំបន់ព្រំដែន។ ទី៣ ទឹក គឺមានសារសំខាន់ណាស់ទាំងទឹកប្រើប្រាស់ និងទឹកប្រើក្នុងវិស័យ កសិកម្ម ក្នុងការដាំដំណាំផ្សេងៗ ជាពិសេសដំណាំស្រូវ ហើយបច្ចុប្បន្ននេះ ប្រទេសយើងបាននាំអង្ករចេញទៅបរទេសជាច្រើន។ និងទី៤- ភ្លើង គឺសំដៅលើអគ្គិសនី ដូចនេះគោលនយោបាយរបស់រាជរដ្ឋាភិបាលធ្វើយ៉ាងណាឱ្យប្រជាពលរដ្ឋទាំងអស់មានអគ្គិសនីប្រើប្រាស់។ ឯកឧត្តមកិត្តិសង្គហបណ្ឌិត ទេព ងន បានរំលឹកអំពីការតស៊ូរំដោះប្រទេសជាតិមាតុភូមិរបស់ថ្នាក់ដឹកនាំ ធ្វើឱ្យមានសុខសន្តិភាពប្រទេសជាតិមានការអភិវឌ្ឍ និងរីកចម្រើនលើគ្រប់វិស័យ។ បច្ចុប្បន្ននេះ ថា្នក់ដឹកនាំបានគិតគូរអំពីអ្នកបន្តវេន ដូចនេះមានតែក្មួយៗនេះហើយ ជាអ្នកបន្តវេនសម្រាប់ប្រទេសជាតិ។ ឯកឧត្តមកិត្តិសង្គហបណ្ឌិត ទេព ងន បានសំដែងនូវមោទនភាពចំពោះរាជរដ្ឋាភិបាលដែលមានគោលការណ៍ និងគោលនយោបាយច្បាស់លាស់ ក្នុងការបណ្តុះបណ្តាលធនធានមនុស្ស រួមចំណែកក្នុងការអភិវឌ្ឍប្រទេសជាតិឱ្យមានការរីចម្រើនដូចបណ្តាប្រទេសនានានៅលើពិភពលោក។ សូមបញ្ជាក់ថា ឆ្នាំនេះបេក្ខជនជ័យលាភីអាហារូបករណ៍រដ្ឋាភិបាលអូស្ត្រាលី មានសមាជិកសរុបចំនួន២២នាក់ ក្នុងនោះមានស្រីចំនួន១០នាក់ មានសមាសភាពចេញពីមន្ត្រីរាជការ បុគ្គលិកក្រុមហ៊ុនឯកជន និងមន្ត្រីអង្គការក្រៅរដ្ឋាភិបាល។ សមាជិកចំនួន ៥នាក់ នឹងត្រៀមចេញដំណើរទៅបន្តការសិក្សានៅដើមខែកុម្ភៈ និងសមាជិកដទៃទៀត នៅខែមិថុនា ឆ្នាំ២០២២នេះ៕