អភិបាលខេត្តបន្ទាយមានជ័យឯកឧត្តម អ៊ុំ រាត្រី បានថ្លែងថារដ្ឋបាលខេត្តបន្ទាយ មានជ័យ បានត្រៀមជានិច្ចគាំទ្រនូវគំនិតផ្តួចផ្តើម និងសហការជាមួយសមាគមជប៉ុន-កម្ពុជា(JCA) នូវគ្រប់សកម្មភាពទាំងឡាយណាដែលនាំមកនូវការរីកចម្រើនដល់ខេត្តនោះ។ការថ្លែងគូសបញ្ជាក់យ៉ាងដូច្នេះរបស់ឯកឧត្តម អ៊ុំ រាត្រី បានធ្វើឡើងក្នុងឱកាស ជួប ប្រជុំពិភាក្សាការងារជាមួយ Mr.Tamura Tsutomu នាយកសមាគមជប៉ុន-កម្ពុជា(JCA) និងជា ប្រធានគ្រប់គ្រងទូទៅក្រុមហ៊ុន NIPPON KOEI CO,LTD និងសហការី ដែលបានអញ្ជើញមក ទស្សនកិច្ចនៅលើទឹកដីខេត្តបន្ទាយមានជ័យនៅព្រឹកថ្ងៃទី១ ខែកុម្ភៈ ឆ្នាំ២០២២នេះ។
ឯកឧត្តម អ៊ុំ រាត្រី ក៏បានសំណូមពរដល់លោកនាយកសមាគមជប៉ុនកម្ពុជាមេត្តា ជួយផ្សព្វផ្យាយក៏ដូចជាជំរុញដល់អ្នកវិនិយោគ និងអ្នកទេសចរជប៉ុន ឱ្យចូលមកវិនិយោគទុន និងទស្សនាកម្សាន្តនៅលើទឹកដីនៃខេត្តបន្ទាយមានជ័យ ដើម្បីជួយលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែមានការរីកចម្រើនថែនទៀតនោះ។
ជាមួយនោះឯកឧត្តម អ៊ុំ រាត្រី បានបង្ហាញឱ្យដឹងដែរថា ខេត្តបន្ទាយមានជ័យស្ថិតនៅ ប៉ែកពាយ័ព្យនៃព្រះរាជាណាចក្រកម្ពុជា មានចម្ងាយប្រមាណ ៣៥៩គីឡូម៉ែត្រ ពីរាជធានី ភ្នំពេញ មានព្រំប្រទល់ជាប់ប្រទេសថៃ ប្រវែង ១៥៣ គីឡូម៉ែត្រ។ ខេត្តមានផ្ទៃដីសរុប ៦៦៧៩ គីឡូម៉ែត្រការ៉េ ចែកចេញជា០២ ក្រុង ០៧ស្រុក ៥៥ ឃុំ១០សង្កាត់ និង៦៥៨ ភូមិ មានប្រជាពលរដ្ឋ ប្រមាណ ៧៩ម៉ឺននាក់ ក្នុងនោះមាន ៨៥ភាគរយប្រកបមុខរបរធ្វើស្រែចំការ និង១៥ ភាគរយជាអាជីវករ ពាណិជ្ជករ សិប្បករ កម្មករ នេសាទត្រី និងចិញ្ចឹមសត្វ។
ខេត្តបន្ទាយមានជ័យមានច្រកសេដ្ឋកិច្ចសំខាន់ៗចំនួន០៣គឺ ច្រកព្រំដែនអន្តរជាតិ ប៉ោយប៉ែត ច្រកបឹងត្រកួន និងច្រកម៉ាឡៃ ខេត្តក៏មានតំបន់សេដ្ឋកិច្ច ពិសេស០៥ កន្លែង នៅក្រុងប៉ោយប៉ែត គឺតំបន់សេដ្ឋកិច្ចពិសេសអូរនាង តំបន់សេដ្ឋកិច្ចពិសេសសានកូ តំបន់សេដ្ឋកិច្ច ពិសេសប៉ោយប៉ែតភីភី តំបន់សេដ្ឋកិច្ចពិសេស លី អ៊ុតនី ព្រមទាំង ឧទ្យានឧស្សា ហកម្ម០១កន្លែង នៅក្រុងសិរីសោភ័ណ។
ដោយឡែកនៅក្រុងប៉ោយប៉ែត មាន ក្រុមហ៊ុនជប៉ុនចំនួន០៦កន្លែងកំពុងដំណើរការនៅតំបន់សេដ្ឋកិច្ចពិសេសសានកូ និង០១ ក្រុមហ៊ុនទៀតនៅតំបន់សេដ្ឋកិច្ចពិសេសប៉ោយប៉ែតភីភី(ផលិតសម្ភារបរិក្ខារអេឡិចត្រូនិក)។
Mr.Tamura Tsutomu នាយកសមាគមជប៉ុន-កម្ពុជា(JCA) បានជម្រាបថា សមាគម ជប៉ុនគ្រោងនឹងដឹកនាំវិនិយោគទុនជប៉ុន មកធ្វើទស្សនកិច្ចនៅព្រះរាជាណាចក្រកម្ពុជា នឹង មកកាន់ទឹកដីខេត្តបន្ទាយមានជ័យ លើសក្តានុពលដែលប្រទេសកម្ពុជា និងខេត្ត បន្ទាយ មានជ័យកំពុងមានដូចជាលើវិស័យ កសិកម្ម ស្រូវដំឡូងមី និងវិស័យឧស្សាហកម្ម ទេសចរណ៍ជាដើម។
លោកបានបញ្ជាក់ថា គោលបំណងដំណើរទស្សនកិច្ចលើទឹកដីខេត្តបន្ទាយមានជ័យឱកាសនេះជា ការសិក្សាឈ្វេងយល់បន្ថែមពីសក្តានុពលខេត្ត ប្រមូលព័ត៌មានថ្មីៗបន្ថែម និងពិនិត្យមើលលទ្ធផលបញ្ហាប្រឈមផ្សេងៗ ដំណើរការរបស់ក្រុមហ៊ុនរោងចក្ររបស់ជប៉ុនដែលបានកំពុងដំណើរការនៅក្រុងប៉ោយប៉ែត ខេត្តបន្ទាយមានជ័យនេះ។
លោកនាយកសមាគមជប៉ុន-កម្ពុជា(JCA) បន្តថា អ្វីដែលជាសំណូមពររបស់ ឯកឧត្តម អភិបាលខេត្ត លោកនឹងខិតខំជួយជំរុញផ្សព្វផ្សាយព័ត៌មានពីសក្តានុពលរបស់ខេត្តបន្ទាយ មានជ័យនេះជូនទៅកាន់បណ្តាវិនិយោគទុនក្រុមហ៊ុនជប៉ុនទាំង ដែលមានសកម្មភាពវិនិ យោគនៅកម្ពុជា និងវិនិយោគនៅបរទេសក្រោយពីមានភាពធូរស្រាលនៃវិបត្តិជំងឺកូវីដ ១៩នេះ៕
