តាមរយៈសកម្មភាពអុំទូកកម្សាន្ត និងការប្រមូលសំណល់ប្លាស្ទិកបឹងទន្លេសាប ដែលបានបង្កើតឡើងនៅភូមិបណ្តែតទឹកពាមតាអួរ ក្នុងឃុំកែវពណ៌ ស្រុកពួក ខេត្តសៀមរាប គឺជាផលិតផលទេសចរណ៍ថ្មីមួយ ដែលបានទាញផលប្រយោជន៍ជាច្រើនដល់ប្រជាសហគមន៍ និងបានទាំងសម្អាតសំរាមប្លាស្ទិកពីក្នុងបឹងទន្លេសាបផង។
អ្នកយកព័ត៌មានយើងប្រចាំខេត្តសៀមរាបធ្វើសេចក្តីរាយការណ៍!
ថ្លែងក្នុងឱកាសបើកជាផ្លូវការកម្មវិធីទេសចរណ៍បរិស្ថាន នៅភូមិបណ្តែតទឹកពាមតាអួរ ឃុំកែវពណ៌ ស្រុកពួក ខេត្តសៀមរាប លោក ស៊ា សុផល ប្រធានអង្គការមូលនិធិទំពាំងស្នងឫស្សី មានប្រសាសន៍ថា កម្មវិធីទេសចរណ៍បរិស្ថាន ត្រូវបានបង្កើតឡើង ក្រោមកិច្ចសហការរវាងអង្គការមូលនិធិទំពាំងស្នងឫស្សី ជាមួយនិងសមាគមទេសចរណ៍កម្ពុជា (CATA) ដែលកម្មវិធីនេះ នឹងលើកកម្ពស់ជីវភាពសហគមន៍ តាមរយៈការបង្កើតចំណូលដោយផ្ទាល់ពីទេសចរ។ លោកបន្តថា ស្របពេលដែលប្រជាសហគមន៍អាចប្រមូលប្លាស្ទិកច្រកដប ប្តូរយកអង្ករពីគម្រោង និងក៏ជាការទាក់ទាញភ្ញៀវទេសចរជាតិនិងអន្តរជាតិឱ្យទៅកម្សាន្ត តាមរយៈកម្មវិធីអុំទូក គយគន់សម្រស់ធម្មជាតិដែលសហគមន៍បានបង្កើតឡើងដោយអ្នកទេសចរត្រូវប្រើប្រាស់សេវាកម្មអុំទូក របស់សហគមន៍ដោយផ្ទាល់ ពេលនោះប្រាក់ចំណូលដែលបងប្អូនទទួលបាន នឹងជួយលើកកម្ពស់ជីវភាពប្រជាសហគមន៍ឱ្យល្អប្រសើរ។
លោកបន្តថា៖«ស្របពេលដែលបងប្អូនប្រមូលប្លាស្ទិក ទុកដាក់សម្អាតបរិស្ថាន ហើយទុកដូរយកអង្ករផង ហើយក៏ក្លាយជាសកម្មភាពថ្មី អាចទាក់ទាញទេសចរ ដល់អ៊ីចឹងមិនបាច់រង់ចាំ ៣ខែម្តងសប្បុរសជនយកអំណោយមកចែក ពេលហ្នឹងបងប្អូនបានចំណូលដោយផ្ទាល់ ពីទេសចរ ហើយអុំទូកលេងកន្លែងណា ឃើញសំរាមទាក់ យើងសម្អាតរាល់ថ្ងៃ វាទៅជាសកម្មភាពប្រចាំថ្ងៃ អ៊ីចឹងសង្ឈឹមថាចាប់ពីថ្ងៃនេះទៅ ជាថ្ងៃប្រវត្តិសាស្រ្តមួយសម្រាប់សហគមន៍ »។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា មានប្រសាសន៍ថា កម្មវិធី ទេសចរណ៍បរិស្ថាន បានផ្តល់អត្ថប្រយោជន៍ជាច្រើន សម្រាប់បងប្អូនរស់នៅក្នុងភូមិពាមតាអួរ នៃសហគមន៍មេជ្រៃ ព្រោះថាពួកគាត់អាចទទួលបានការ រស់នៅស្អាត គ្មានសំរាមប្លាស្ទិក និងទទួលបានប្រាក់ចំណូលដោយផ្ទាល់ពីវិស័យទេសចរណ៍ ដោយគ្រាន់តែពួកគាត់ត្រូវថែរក្សាអ្វីដែលមានស្រាប់ ទាំងកត្តាអំណោយផលពីធម្មជាតិ និងការសម្អាតបរិស្ថានជាដើម។
លោកស្រីបញ្ជាក់ថា៖«ដែលហៅថាកន្លែងទាក់ទាញទេសចរជាកន្លែងដែលស្អាត ហើយយើងមានអ្វីឱ្យគេមើល យើងមានទឹក មានភូមិស្ថានមានសកម្មភាពមុខរបរប្រចាំថ្ងៃរបស់ប្រជាជនយើង យើងមានព្រៃ មានសត្វ មានត្រី ទាំងអស់ហ្នឹងគឺជាចំណុចទាក់ទាញទេសចរ ទាំងក្នុងនិងក្រៅស្រុក អ៊ីចឹងបើយើងមិនបានថែរក្សារបស់ទាំងអស់ហ្នឹងទេ យើងអត់មានអ្វីត្រូវទទួល ភ្ញៀវទេ យើងយកឱកាសក្នុងពេលនេះ ជាពេលដែលយើងអបអរ នូវទេសចរណ៍បរិស្ថាន ដែលបានចូលរួមកន្លងមក ហើយក៏យកឱកាសនេះក្នុងការផ្សព្វផ្សាយ បញ្ជ្រាបការយល់ដឹងជាពិសេសទៅលើបងប្អូនរស់នៅក្នុងឃុំកែវពណ៌ ឱ្យបានយល់ដឹងពីការ សម្អាតអនាម័យ ការទទួល ភ្ញៀវទេសចរ ការផ្តល់នូវសេវាកម្ម។»
សូមជម្រាបផងដែរថា កម្មវិធីទេសចរណ៍បរិស្ថាន ធ្វើឡើងស្របពេលដែលរាជរដ្ឋាភិបាលកម្ពុជា បានប្រកាសពីការបើកវិស័យទេសចរណ៍ និងទទួលទេសចរអន្ដរជាតិឡើងវិញ នៅខេត្តសៀមរាប នាខែមករា ឆ្នាំ២០២២នេះ។ ការគាំទ្រសហគមន៍ទាក់ទងនឹងការងារបរិស្ថាន គឺមានសារសំខាន់ណាស់ ដើម្បីឱ្យសហគមន៍មានការរៀបចំ សម្អាតអនាម័យ បរិស្ថាន ត្រៀមទទួលទេសចរឡើងវិញ ដែលជាផ្នែកមួយលើកកម្ពស់សេដ្ឋកិច្ចសហគមន៍តាមរយៈវិស័យទេសចរណ៍។ ក្នុងនោះឆ្នាំ២០២២នេះអង្គការមូលនិធិទំពាំងស្នងឬស្សី នឹងជួយរៀបចំ គាំទ្រ ឱ្យមានកម្មវិធីចំនួនពីរ ក្នុងសហគមន៍មេជ្រៃ រួមមាន ទី១គម្រោងប្រមូលប្លាស្ទិកបឹងទន្លេសាបច្រកដប ដូរ យកអង្ករ ចាប់ផ្តើមអនុវត្តចាប់ពីចុងខែមករា រហូតដល់ចុងខែមិថុនា មុនទឹកជំនន់បឹងទន្លេសាបហូរត្រឡប់មកវិញ និងទី២ កម្មវិធីទេសចរណ៍បរិស្ថាន ដែល នឹងមានការជិះទូកកម្សាន្តមើលជីវភាពសហគមន៍ និងទស្សនាជីវៈចម្រុះនានា ដែលនឹងផ្សារភ្ជាប់នឹងសកម្មភាពជួយប្រមូលសំរាមប្លាស្ទិកបឹងទន្លេសាប ដែលទើរតាមដើមឈើជាដើម ហើយវានឹងក្លាយជាសកម្មភាពផលិតផលទេសចរណ៍ថ្មីនៅតាមសហគមន៍បឹងទន្លេសាប៕
