រាជធានីភ្នំពេញ ៖ ទីតាំងល្បែងស៊ីសងខុសច្បាប់ ភ្នាល់បៀ ភ្នាល់បាល់ ប្រភេទអនឡាញ ស្ថិតនៅផ្លូវ៤៧៤ សង្កាត់បឹងត្របែក ខណ្ឌចំការមន រាជធានីភ្នំពេញ កំពុងតែបើកដំណើរការបានយ៉ាងរលូន ដោយគ្មានអាជ្ញាធរនិងសមត្ថកិច្ចក្នុងមូលដ្ឋានណាម្នាក់ហ៊ានចេញមុខមកបង្ក្រាបឡើយ។
តាមប្រភពព័ត៌មាន បានឲ្យដឹងថា៖ ទីតាំងបនល្បែងស៊ីសងខុសច្បាប់ដុះស្លែដល់ធំ តាមអនឡាញ ខាងលើនេះ កំពុងតែបង្វក់ដល់ពលរដ្ឋខ្មែរឲ្យចូលមកលេងល្បែងភ្នាល់ ដាក់លុយ យ៉ាងគគ្រឹកគគ្រេង ដោយគ្មានខ្លាចញញើតនឹងសមត្ថកិច្ចបន្តិចសោះឡើយ។
មហាជនជាច្រើន បានសម្តែងការ ព្រួយបារម្ភយ៉ាងខ្លាំង ចំពោះវត្តមានទីតាំងបនល្បែងខុសច្បាប់ខាងលើ ដែលបើកទទួលភ្ញៀវគ្រប់មជ្ឈដ្ឋានមកពពាក់ពពូនគ្នា លេងល្បែងភ្នាល់ដាក់លុយយ៉ាងអនាធិបតេយ្យ ដោយគ្មានការបង្ក្រាបពីអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋាន។
មហាជន បានលើកឡើងថា ល្បែងស៊ីសងខុសច្បាប់ខាងលើនេះ គឺជាដើមចមនៃការបង្កបង្កើត នៃបទល្មើស ជាពិសេស បទល្មើសហិង្សា បទល្មើសលួច បទល្មើសឆក់ បទល្មើសប្លន់ ហើយនឹងព្រាត់ប្រាសប្រពន្ធកូន គឺកើតចេញពីល្បែងនេះឯង។
ប្រជាពលរដ្ឋ ជាច្រើនសង្ឃឹមថា៖ លោក យិន សាន អធិការនៃអធិការដ្ឋាននគរបាលខណ្ឌចំការមន នឹងចាត់វិធានការបង្ក្រាបបទល្មើសខុសច្បាប់ក្នុងដែនសមត្ថកិច្ចរបស់ខ្លួន។ប្រជាពលរដ្ឋស្នើសុំដល់លោក ថេង សុថុល អភិបាលនៃគណៈអភិបាលខណ្ឌចំការមន ជួយដាស់តឿនដល់មន្ត្រីក្រោមឱវាទចុះបង្ក្រាបល្បែងស៊ីសងដុះស្លែខាងលើនេះផងទាន។
ជុំវិញការចុះផ្សាយខាងលើនេះ អង្គភាពសារព័ត៌មានយើង រង់ចាំការបំភ្លឺពីអាជ្ញាធរនិងសមត្ថកិច្ចពាក់ព័ន្ធរៀងរាល់ម៉ោងធ្វើការ៕
