ខេត្តកំពង់ឆ្នាំង ៖ ឯកឧត្ដម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង រួមជាមួយលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលខេត្តកំពង់ឆ្នាំង ឯកឧត្តម កែវ វណ្ណដេត មេបញ្ជាការមូលដ្ឋានទ័ពអាកាសខេត្តកំពង់ឆ្នាំង តំណាងឯកឧត្តមបណ្ឌិត សឹង សំណាង ប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់លែង សមាជិកក្រុមប្រឹក្សាខេត្ត អភិបាលរងខេត្ត នាព្រឹកថ្ងៃ១០ ខែវិច្ឆិកា ឆ្នាំ២០២១នេះ បានដឹកនាំក្រុមការងារខេត្ត ស្រុក ចុះសួរសុខទុក្ខ និងនាំយកអំណោយឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ប្រគល់ ជូនប្រជាពលរដ្ឋដែលរងគ្រោះដោយខ្យល់កន្ត្រាក់ កាលពីល្ងាចថ្ងៃទី៨ ខែវិច្ឆិកា ឆ្នាំ២០២១ នៅភូមិស្លត និងភូមិពាមខ្នង ឃុំផ្លូវទូក ស្រុកកំពង់លែង ចំនួន ៧៦គ្រួសារ។
ឯកឧត្ដមអភិបាលខេត្ត និងលោកជំទាវអ្នកតំណាងរាស្ត្របាន បានពាំនាំនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែគិតគូរអំពីសុខទុក្ខ របស់បងប្អូនប្រជាពលរដ្ឋគ្រប់ពេលវេលា និងគ្រប់ទីកន្លែង។ ឆ្លៀតក្នុងឱកាសនោះដែរ ឯកឧត្ដម និងលោកជំទាវ បានអំពាវនាវដល់បងប្អូនប្រជាពលរដ្ឋត្រូវបន្តអនុវត្តវិធានការអនាម័យឲ្យបានខ្ជាប់ខ្ជួន ការពារខ្លួនពីជំងឺកូវីដ-១៩ និងអញ្ជើញទៅទទួលវ៉ាក់សាំងឲ្យបានគ្រប់ៗគ្នា។
អំណោយដែលបានប្រគល់ជូនបងប្អូនរងគ្រោះក្នុងមួយគ្រួសារទទួលបាន អង្ករ៤០គ.ក្រ មី១កេះ ត្រីខ១យួរ ទឹកត្រី១យួរ ទឹកស៊ីអ៊ីវ១យួរ និងថវិកា៥ម៉ឺនរៀល។ ឯកឧត្ដម និងលោកជំទាវ ក៏បានចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារកុមារី ហុន ណាវី អាយុ៥ឆ្នាំ ដែលបានទទួលមរណភាពក្នុងហេតុការណ៍ខ្យល់កន្ត្រាក់នេះ និងបានឧបត្ថម្ភថវិការបស់ឯកឧត្ដមបណ្ឌិតសភាចារ្យបន្ថែមចំនួន១លានរៀល សរុបរួមបានឧបត្ថម្ភថវិកាចំនួន ២លាន៥សែនរៀល (ក្នុងនោះថវិកាឯកឧត្ដមនាយឧត្ដមសេនីយ៍ សឹង សំណាង ចំនួន ៥០ម៉ឺនរៀល) ដើម្បីជួយសម្រាលការលំបាករបស់ក្រុមគ្រួសារកុមារីរងគ្រោះ៕
