ខេត្តកណ្ដាល ៖ លោក អៀច សុវណ្ណវាសនា នាយករងរដ្ឋបាលសាលាខេត្ត បានអញ្ជើញដឹកនាំកិច្ចប្រជុំ នាព្រឹកថ្ងៃច័ន្ទ ៤កើត ខែកត្តិក ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី៨ ខែវិច្ឆិកា ឆ្នាំ២០២១នេះ ដើម្បីត្រៀមរៀបចំ ប្រារព្ធខួបអនុស្សាវរីយ៍លើកទី៦៨ នៃនៃទិវាបុណ្យឯករាជ្យជាតិ ៩វិច្ឆិកា និង ទិវាកំណើតកងយោធពលខេមរភូមិន្ទ ឆ្នាំ១៩៥៣-២០២១ ដែលប្រព្រឹត្តទៅនាថ្ងៃទី០៩ ខែវិច្ឆិកា ឆ្នាំ២០២១ ខាងមុខនេះ នៅក្នុងបរិវេណសាលាខេត្ត ក្រោមអធិបតីភាពឯកឧត្តម ម៉ៅ ភិរុណ ប្រធានក្រុមប្រឹក្សាខេត្ត និងឯកឧត្តម គង់ សោភ័ណ្ឌ អភិបាលនៃគណៈអភិបាលខេត្ត ។
លោកប្រធានអង្គប្រជុំបានបញ្ជាក់ថា ការរៀបចំពិធីនេះពិតជាមានសារៈសំខាន់ណាស់ ក្នុងគោលបំណងសម្តែងនូវទឹកចិត្តសោមនស្សរីករាយ និងអបអរសាទរយ៉ាងក្លៀវក្លាបំផុត ចំពោះទិវាជាប្រវត្តិសាស្ត្រ ដែលមហាកម្លាំង មហាសាមគ្គីជាតិទាំងមូល ដណ្តើមបានទាំងស្រុងមកវិញនូវ ឯករាជ្យជាតិមួយដ៏ពេញបរិបូណ៍ ពីអាណានិគមនិយមបារាំង នាថ្ងៃទី០៩ ខែវិច្ឆិកា ឆ្នាំ១៩៥៣ ដោយស្នាព្រះហស្ថ ព្រះរាជបូជនីយកិច្ចដ៏ថ្លៃថ្លាឧត្តុង្គឧត្តម នៃព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ” នៃព្រះរាជាណាចក្រកម្ពុជា ។
ថ្លែងក្នុងកិច្ចប្រជុំ លោក នាយករងរដ្ឋបាលសាលាខេត្ត បានស្នើកងកម្លាំង ព្រមទាំងមន្ទីរ-អង្គភាព និងក្រុមការងារពាក់ព័ន្ធត្រូវយកចិត្តទុកដាក់អនុវត្តផែនការណែនាំរបស់រដ្ឋបាលខេត្ត និងកម្មវិធីដែលបានគ្រោងទុក ប្រកបដោយទំនួលខុសត្រូវខ្ពស់ ដើម្បីអង្គពិធីប្រព្រឹត្តទៅដោយរលូន ។ ជាមួយគ្នានេះ ស្នើកងកម្លាំងនគរបាល សហការជាមួយរដ្ឋបាលក្រុងតាខ្មៅ ដើម្បីការពារសន្តិសុខ សុវត្ថិភាព ជូនអង្គពិធីនៅមុនពេល ក្នុងពេល និងក្រោយបញ្ចប់អង្គពិធី ។ ទន្ទឹមនោះ រៀបចំឱ្យមានក្រុមគ្រូពេទ្យត្រៀមបាញ់អាកុល វាស់កម្តៅសមាជិកមុនចូលអង្គពិធី ដើម្បីបង្ការទប់ស្កាត់ការឆ្លងជំងឺកូវីដ-១៩ ព្រមទាំងត្រៀមឡានពេទ្យសង្គ្រោះបន្ទាន់ និងថ្នាំសង្កូវ ដើម្បីជួយសង្គ្រោះ ក្នុងគ្រាដែលមានបញ្ហាអ្វីមួយកើតឡើងជាយថាហេតុ ។
