ក្រុមការងារ​ព័ត៌មាន និងប្រតិកម្ម​រហ័ស ​នៃស្នងការដ្ឋាននគរបាលខេត្តកណ្តាល មានកិត្តិយស​សូមបំភ្លឺឆ្លេីយតបទៅនឹង​គណនីហ្វេសប៊ុកឈ្មោះ ពិសិទ្ធ កៅអីដេគ័រ ដែល

ក្រុមការងារ​ព័ត៌មាន និងប្រតិកម្ម​រហ័ស ​នៃស្នងការដ្ឋាននគរបាលខេត្តកណ្តាល មានកិត្តិយស​សូមបំភ្លឺឆ្លេីយតបទៅនឹង​គណនីហ្វេសប៊ុកឈ្មោះ ពិសិទ្ធ កៅអីដេគ័រ ដែល​បានបង្ហោះមានខ្លឹមសារថាៈ​​ ធ្លាប់តែលឺគេថានិងឃើញតាមហ្វេសប៊ុកឥឡូវជួបផ្ទាល់ហើយនេះប្រហែលជាថ្ងៃស៊យរបស់ខ្ញុំហើយដែលបើកឡានមកដល់ទួលអង្គាំខាងក្រោមអនុវិទ្យាល័យកំពង់កុងប្រហែល៣០០ម៉ែត្រត្រូវក្មេងទំនើងគប់ពីក្រោយបែកខ្ទេចនៅម៉ោង ១១ និង ៣០នាទី យប់ថ្ងៃទី០៨-០៥-២០២៣ សូមបងប៉ូលិសឃុំកំពង់កុងជួយពង្រឹងសុវត្ថិភាពជូនប្រជាជនផង។

​ក្រោយពីទទួលបានព័ត៌មានខាងលេីរួច​ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកវរសេនីយ៍ឯក​ ស៊ីម​ ឃាង​ អធិការនគរ​បាលស្រុក​កោះធំ ចំណាត់ការស្រាវជ្រាវករណីខាងលើជាបន្ទាន់។

+ជាលទ្ធផល​៖
លោកឧត្តមសេនីយ៍ត្រី ឡាក់ ម៉េងធី ស្នងការរងទទួលផែនព្រហ្មទណ្ឌ បានដឹកនាំកម្លាំងជំនាញ និងកម្លាំងអធិការដ្ឋាននគរបាលស្រុកកោះធំ ចុះស្រាវជ្រាវករណីខាងលើដោយផ្ទាល់ទទួលទ្ធផលដូចខាងក្រោម៖

-ចំណុចទី១៖ តាមការចុះពិនិត្យស្រាវជ្រាវ ទៅលើផេកហ្វេសប៊ុក ឈ្មោះ ពិសិទ្ធ កៅអីដេគ័រ ដែលបានបង្ហោះខ្លឹមសារខាងលើ កម្លាំងជំនាញស្រុកកោះធំ រួមជាមួយកម្លាំងប៉ុស្ដិ៍នគរបាលរដ្ឋបាលកំពង់កុង បានចុះស្រាវជ្រាវ និងសួរនាំសាក្សីដែលរស់នៅចំណុចកើតហេតុ ក្នុងភូមិទួលដូនគាំ ឃុំកំពង់កុង ស្រុកកោះធំ ខេត្តកណ្ដាល គឺពុំមានករណី គប់កញ្ចក់រថយន្ដនោះទេ។

-ចំណុចទី២៖ តាមការចុះពិនិត្យនៅចំណុចកើតហេតុ លើកំណាត់ផ្លូវជាតិលេខ ១១០ ស្ថិតនៅ ភូមិទួលដូនគាំ ឃុំកំពង់កុង ស្រុកកោះធំ ខេត្តកណ្ដាល ផ្លូវមានសភាពរលក ហើយមានកម្ទេចកញ្ចក់ជ្រុះរាយតាមដងផ្លូវប្រមាណ ២០០ម៉ែត្រ។

-ចំណុចទី៣៖ តាមការពិនិត្យលើរថយន្ដ ០១គ្រឿង ម៉ាក ស្ទារិច ពណ៌ទឹកមាស ស៊េរីឆ្នាំ១៩៩៧ ពាក់ផ្លាក់លេខ កណ្ដាល 2A-6280 ដែលជារបស់ឈ្មោះ ឆែម ធារី ភេទប្រុស អាយុ ៥០ឆ្នាំ ជនជាតិខ្មែរ សញ្ជាតិខ្មែរ មុខរបរ តុបតែងរោងការ រស់នៅ ភូមិព្រែកឡុង សង្កាត់រកាខ្ពស់ ក្រុងតាខ្មៅ ខេត្តកណ្ដាល (ជាម្ចាស់គណនី ពិសិទ្ធ កៅអីដេគ័រ) នៅចំណុចផ្ទះជួសជុលរថយន្ដ ចម្ងាយពីផ្ទះជនរងគ្រោះ ប្រហែល ២០០ម៉ែត្រ រថយន្ដ ពិតជាបែកកញ្ចក់ផ្នែកខាងក្រោយ ០១ផ្ទាំង និងមានស្លាកស្នាមកកិតបុកជាច្រើនទៅនឹងដែកតុបតែងរោងការ ដោយមានការបញ្ជាក់ពីកូនម្ចាស់រថយន្ដបានឱ្យដឹងថា មុនពេលកើតហេតុឪពុកឈ្មោះ ឆែម ធារី បានដឹងសម្ភារៈសម្រាប់តុបតែងរោងការ រួមមាន ផ្កា ,កៅអី ,ដែកស័ង្កសី ចំនួន ០៣ផ្ទាំង មានទទឹងប្រហែល ០.៥០ម៉ែត្រ បណ្ដោយប្រហែល ២.៥០ម៉ែត្រ និងសម្ភារៈមួយចំនួនទៀត។

**សន្និដ្ឋាន៖
ករណីខាងលើ ពុំមែនជាករណី គប់កញ្ចក់រថយន្ដឡើយ កញ្ចក់រថយន្ដបែកបណ្ដាលមកពីការកកិតបុកនឹងដែកស័ង្កសីក្នុងរថយន្ដ ដោយស្ថានភាពផ្លូវរលក។

-ចំពោះម្ចាស់រថយន្ដឈ្មោះ ឆែម ធារី កម្លាំងសមត្ថកិច្ចពុំទាន់បានសួរនាំនិងធ្វើកំណត់ហេតុទេ ដោយរូបគាត់កំពុងមានធុរៈផ្ទាល់ខ្លួននៅឯខេត្តតាកែវ។

​អាស្រ័យហេតុនេះសូមសាធារណជនជ្រាប និងកុំមានការភាន់ច្រឡំ៕