រាជធានីភ្នំពេញ ៖ ការជីកស្តារប្រឡាយម័ល នៅក្នុងភូមិសាស្រ្តភូមិម័ល សង្កាត់ដង្កោ ខណ្ឌដង្កោ មាន ប្រវែងជាង៣គីឡូម៉ែត្រហើយ ដោយចាប់ពីស្ថានីយបូមទឹកលូ៥ ដល់ស្ថានីយបូមទឹកបឹងទំពុន ក្នុងសង្កាត់បឹងទំពុនទី២ ខណ្ឌមានជ័យ សម្រេចបានប្រមាណ៩០ភាគរយហើយ ពោលគឺនៅសល់ប្រវែងប្រមាណ៤០០ម៉ែត្រប៉ុណ្ណោះ។
មន្ត្រីនៃមន្ទីរធនធានទឹកនិងឧតុនិយម រាជធានីភ្នំពេញ បានឱ្យដឹងថា ក្រោមការណែនាំរបស់ឯកឧត្តម ឃួង ស្រេង អភិបាលរាជធានីភ្នំពេញ ក្រុមការងារនៃមន្ទីរធនធានទឹកនិងឧតុនិយមរាជធានីភ្នំពេញបាននិងកំពុងធ្វើសកម្មភាពស្តារប្រឡាយម័ល ដោយចាប់ផ្តើមស្តារ កាលពីថ្ងៃទី១៨កុម្ភៈឆ្នាំ២០២១ ដែលមានប្រវែងជាង៣គីឡូម៉ែត្រ ទទឹងចាប់ពី២០ម៉ែត្រទៅ៣០ម៉ែត្រ ចាប់ពីស្ថានីយបូម ទឹកលូ៥ ដល់ស្ថានីយបូមទឹកបឹងទំពុន ។ មន្ត្រីដដែលបានបញ្ជាក់ថា ចំពោះមូលហេតុដែលបង្កឱ្យមានភាពយឺតយ៉ាវនៃការស្តារប្រឡាយម័លនេះ គឺដោយសារ មានឧបសគ្គមួយចំនួន ពិសេសក្នុងកំណាត់ប្រឡាយប្រវែងជាង៤០០ម៉ែត្រដែលនៅសេស សល់នេះ ដោយសារតែមាន បងប្អូនប្រជាពលរដ្ឋមួយចំនួន សាងសង់ស្ពាន ខ្លះបោះបង្គោលឈើ និង ថ្មនៅក្នុងប្រឡាយស្ទើរ បិទផ្លូវទឹកទៅហើយ ។ កត្តាទាំង នេះ បានធ្វើឱ្យក្រុមការងារ ស្តារប្រឡាយភូមិម័លនៃមន្ទីរធនធានទឹករាជធានីភ្នំពេញអូស បន្លាយពេលវេលាអស់ជាច្រើនខែ ។
រហូតដល់ថ្ងៃទី០៧ខែកញ្ញាឆ្នាំ២០២១នេះ ក្រុមការងារជំនាញបានបន្តដាក់គ្រឿងចក្រ ជីក ស្ដារប្រឡាយដើម្បី រំដោះទឹកចេញពីផ្នែកខ្លះនៃប្រឡាយលូប្រាំ ប្រឡាយទួលពង្រទី១ និងផ្នែកខ្លះទៀតមកពីខណ្ឌ ពោធិ៍សែនជ័យនិងខណ្ឌសែនសុខ ។ ការងារស្ដារប្រឡាយ ភូមិម័ល នេះ ចែកចេញជា ៣ដំណាក់ កាល ក្នុងនោះ ដំណាក់កាលទី១ គឺក្រុមការងារដាក់គ្រឿងចក្រឈរ នៅលើដីគោកចាប់ពីស្ថានីយ បូមទឹកលូប្រាំ ដំណាក់កាលទី២ និងទី៣ ត្រូវដាក់គ្រឿងចក្រក្នុងសាឡង់ចុះស្តាររហូតដល់ស្ថានីយបូមទឹកបឹងទំពុន ។រហូតមកដល់ពេលនេះប្រឡាយភូមិម័លត្រូវបានក្រុមការងារស្ដារនិងកាយយកភក់ សំរាម និង ស្មៅ ដើមឈើដុះក្នុងប្រឡាយសម្រេចបានប្រមាណ៩០ ភាគរយហើយ។ មន្ត្រីនៃមន្ទីរធនធានទឹកនិងឧតុនិយម បានបញ្ជាក់ទៀតថា ប្រឡាយម័លនេះមានតួនាទីយ៉ាងសំខាន់ក្នុងការរំដោះទឹកពីភូមិដ្ឋានប្រជាពលរដ្ឋ ដោយបានរំដោះទឹកភ្លៀងមួយផ្នែកខ្លះនៃខណ្ឌដង្កោ ខណ្ឌពោធិ៍សែនជ័យនិងខណ្ឌមានជ័យ ៕
