មន្ទីរកសិកម្មកម្ម រុក្ខាប្រមាញ់និងនេសាទខេត្តស្ទឹងត្រែង ចែកជូនកូនមាន់ពូជ ដល់កសិករចំនួន៥៥០គ្រួសារ នៅតាមបណ្តាឃុំចំនួន២២ ដើម្បីពង្រីកបរិមាណការចិញ្ចឹមសត្វឱ្យបានច្រើន

ខេត្តស្ទឹងត្រែង ៖ មន្ត្រីមន្ទីរកសិកម្មកម្ម រុក្ខាប្រមាញ់និងនេសាទខេត្តស្ទឹងត្រែង នាំយកកូនមាន់ពូជចែកជូនកសិករចំនួន៥៥០គ្រួសារ នៅតាមបណ្តាឃុំចំនួន២២ ដើម្បីពង្រីកបរិមាណការចិញ្ចឹមសត្វឱ្យបានច្រើន ទៅ ដល់ទីជនបទ ស្របតាមកម្ម វិធីផ្សព្វផ្សាយបច្ចេកទេសកសិកម្មថ្មី ដែលធន់នឹងការ ប្រែប្រួលអាកាសធាតុហៅកាត់ថា(AS PIRE)។

ក្នុងឱកាសផ្តល់កូនមាន់ពូជ ដល់កសិករ កាលពីថ្ងៃទី ០៥ ខែកញ្ញាឆ្នាំ២០២១ នៅសង្កាត់សាមគ្គីក្រុងខេត្តស្ទឹង ត្រែងលោកទំ នីរ៉ូ ប្រធានមន្ទីរកសិកកម្ម រុក្ខាប្រមាញ់និងនេសាទខេត្តមានប្រសាសន៏ថា៖ នេះជាដើមទុនមួយ ដើម្បីរួមចំណែកជួយបងប្អូនប្រជាពលរដ្ឋយើង ឱ្យមានមុខរបរចិញ្ចឹមសត្វជាលក្ខណៈគ្រួសារ និងពង្រីកបន្តឱ្យមានបរិមាណច្រើន សម្រាប់ដោះ ស្រាយជីវភាពប្រចាំថ្ងៃ និងអាចនាំយកទៅលក់ដូរនៅទីផ្សារបានបន្ថែមផង ។

លោកបន្តថា ទទួលបាន កូនពូជមាន់នេះបងប្អូនត្រូវយកទៅចិញ្ចឹមតាមលក្ខណៈបច្ចេកទេសដែលមន្ត្រីជំនាញបានពន្យល់ ពីរបៀបថែទាំរួចមកហើយនោះ។

សំឡេង” ក្នុងការផ្ដល់ជូនបងប្អូនជាពូជនៅពេលហ្នឹងគឺបងប្អូនធ្វើពង្រីកដោយខ្លួនឯងទៀត បង្កើននូវផលិតភាពរបស់ខ្លួន ឱ្យច្រើន ចិញ្ចឹមពីតិចទៅច្រើនអីហ្នឹង ជាការចូលរួមផ្ទាល់របស់បងប្អូន ហើយរឿងពង្រីកមិនពង្រីកគឺលើបងប្អូន ហើយចិញ្ចឹមទៅដាំដុះទៅ វាលូតលាស់ល្អ យើងលក់អាចទ្រទ្រង់ជីវភាពគ្រួសារបាន ពង្រីកវាទៅវាអត់ខុសទេ”។

លោកជា ម៉ាលី ចៅសង្កាត់សាមគ្គីបានចាត់ទុកថា នេះជាផលរបរដែលមិនចេះរីងស្ងួត ហើយបងប្អូនយើងត្រូវតែយក ចិត្តទុកដាក់ ព្រោះវាជាធន ធានបានមកពីរាជរដ្ឋាភិបាលផ្តល់ឱ្យ តាមរយៈមន្ទីរកសិកម្ម យកមកចែកជូនដោយផ្ទាល់ ដៃ។

“អ៉ីចឹងប្រជាពលរដ្ឋរីករាយ និងការទទួលយកចំណាប់អារម្មណ៍លើការចិញ្ចឹមសត្វ បន្លែបង្ការក៏មន្ទីរកសិកម្មគេជួយផ្គត់ផ្គង់ដែរ អញ្ចឹងការធ្វើរបស់ប្រជាពល រដ្ឋគឺមានចំណាប់អារម្មណ៍ច្រើនពិសេសគឺ ពេលកូវីដនេះតែម្ដង សម័យរស់នៅក្នុងបរិបទកូវីដនេះប្រជាពលរដ្ឋយើង ងាកមកដាំដុះនិងចិញ្ចឹម សត្វនេះច្រើនគ្រួសារ”។

លោក ទឹម កុសល កសិកររស់នៅភូមិហាងខូបាន -បានទទួលស្គាល់ថា ការចិញ្ចឹមសត្វនិងដាំបន្លែបង្ការជាលក្ខណៈគ្រួសារពិតជាបានជួយលើកកម្ពស់ជីវភាពរស់ នៅបានល្អ ព្រោះមិនបាច់ចំណាយថវិកានិងពេលវេលាទៅទិញពីទីផ្សារមកទេ។

លោកបន្តថា នឹងខិតខំពង្រីកមុខរបរចិញ្ចឹមសត្វឱ្យបានរីកចម្រើនតាមការណែនាំរបស់មន្ទីរកសិកម្ម ហើយដើម ទុននេះសមល្មមអាចធ្វើទៅបានហើយ ព្រោះកន្លងមកធ្លាប់ទទួលបានការបណ្តុះ បណ្តាលផ្នែកបច្ចេកទេសពីការចិញ្ចឹមសត្វរួចមកហើយដែរ។

សូមបញ្ជាក់ថា កសិករទាំង៥៥០គ្រួសារនេះ ទទួលបានពូជកូនមាន់ក្នុងមួយគ្រួសារចំនួន២០ក្បាលចំណី ៥គីឡូក្រាម ឧបករណ៍ដាក់ទឹកចំនួន២ និងដាក់ចំណីចំនួន២ផងដែរ៕