រាជធានីភ្នំពេញ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់និងនេសាទ បានបន្តអំពាវនាវដល់ផ្នែកឯកជន ពន្លឿនការសិក្សាសាងសង់ហេដ្ឋារចនាសម្ព័ន្ធកែច្នៃមៀនប៉ៃលិន ដើម្បីងាយស្រួលក្នុងការនាំ ចេញទៅក្រៅប្រទេស ខណៈដែលបច្ចុប្បន្នក្រសួងកំពុងខិតខំចរចាជាមួយភាគីចិននិងថៃ ។
ឯកឧត្តម ងិន ឆាយ អគ្គ នាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា មកទល់ពេលនេះ ការស្នើសុំបើកទីផ្សារសម្រាប់នាំផ្លែមៀនប៉ៃលិនរបស់កម្ពុជាទៅកាន់ប្រទេសចិន ទើបតែឈាន ដល់ដំណាក់កាលទីពីរតែ ប៉ុណ្ណោះ ដែលដំណាក់កាលបន្ទាប់នោះ គឺភាគីចិនបានស្នើឱ្យកម្ពុជាធ្វើបច្ចុប្បន្នភាពបន្ថែម លើការស្រាវជ្រាវនិងការដាក់ចេញវិធានការសម្រាប់ទប់ស្កាត់និងកម្ចាត់សមាសភាពចង្រៃ ។
ដោយហេតុនេះ ឯកឧត្តមបន្តថា ដើម្បីជួយឱ្យការងារនាំ ចេញផ្លែមៀនប៉ៃលិនស្រស់ទៅកាន់ប្រទេសចិនឱ្យកាន់តែមានភាពល្អប្រសើរ ក្រសួងបានបន្តអំពាវនាវដល់វិស័យឯកជន ដែលមានបំណងធ្វើ ការវិនិយោគលើដំណាំមៀនប៉ៃលិននេះ សូមរួសរាន់សាង សង់ឬកែលម្អហេដ្ឋារចនា
សម្ព័ន្ធដែលមានស្រាប់ ដើម្បីត្រៀមលក្ខណៈរួចជាស្រេច នៅពេលដែលភាគីចិននិងថៃឯកភាពក្នុងការនាំចេញ ។
« ខ្ញុំសូមអំពាវនាវដូចជាក្រសួងកសិកម្មបានចេញសេចក្ដីជូនដំណឹងហើយ អ្នកដែលមានបំណងចង់ធ្វើ ការវិនិយោគផ្លែមៀនប៉ៃលិននេះ សូមរូតរះដើម្បីធ្វើការសិក្សាសាងសង់ហេដ្ឋារចនាសម្ព័ន្ធ ក្នុងការគាំទ្រទៅដល់ការសម្អាត ការសម្លាប់មេរោគ ក៏ដូចជាការវេចខ្ចប់ ដើម្បីត្រៀមលក្ខណៈ នាំយកមៀនប៉ៃលិនយើងនេះទៅកាន់ប្រទេសចិន នៅពេលដែលការចរចាបើកទីផ្សារទទួលបានជោគជ័យ ព្រោះថាប្រសិនបើយើងមិនទាន់មានហេដ្ឋារចនាសម្ព័ន្ធគ្រប់គ្រាន់ទេនោះ នៅពេលដែលភាគីចិនចុះមកត្រួតពិនិត្យវាយតម្លៃ ក៏គេមិនទាន់អនុញ្ញាតឱ្យនាំផ្លែមៀនប៉ៃលិនចេញទៅបានដែរ ដែលនេះគឺជាការត្រៀម លក្ខណៈមួយឱ្យរួចជាស្រេច មុនពេលដែលភាគីចិនចុះមកវាយតម្លៃ ម្យ៉ាងទៀតក្រសួងកសិកម្ម បាននិងកំពុងពន្លឿនការចរចាគ្រប់ភាគីទាំងអស់ ដើម្បីជួយជំរុញដល់ការពិនិត្យឯកសារ ក៏ដូចជាការចុះទៅត្រួតពិនិត្យទីវាលផ្ទាល់ » ។
សូមបញ្ជាក់ថា ការប្រមូលផលផ្លែមៀនប៉ៃលិនឬ តាង៉ែន គឺចាប់ផ្តើមប្រមូលនៅអំឡុងខែសីហា រហូតដល់ខែកុម្ភៈទើបប្រមូលផលអស់ ហើយស្របពេលជាមួយគ្នានេះ ក្រសួងកសិកម្មក៏បានធ្វើការពិភាក្សាជាមួយអ្នកដាំដុះដោយប្រើបច្ចេកទេសដាំដុះ និងប្រមូលផលផ្លែមៀន ទៅតារាងកាលវិភាគពេលវេលាប្រមូលបណ្តាក់គ្នា ដើម្បីរក្សាតម្លៃទីផ្សារផងដែរ ៕
