កំពង់ស្ពឺ៖ដោយអនុវត្ដតាមបទបញ្ជានិងការចង្អុលបង្ហាញយ៉ាងមុឺងម៉ាត់របស់ ឯកឧត្ដម នាយឧត្ដមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពីសំណាក់ ឯកឧត្ដមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ដកំពង់ស្ពឺ ក្រោមការដឹកនាំបញ្ជាដោយផ្ទាល់របស់លោកឧត្ដមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្ដកំពង់ស្ពឺ បានដាក់បទបញ្ជាឲ្យកម្លាំងជំនាញកងរាជអាវុធហត្ថខេត្តកំពង់ស្ពឺ ចូលរួមសហការជាមួយកម្លាំងគណៈបញ្ជាការឯកភាពក្រុង-ស្រុកចុះត្រួតពិនិត្យ និងធ្វើបច្ចុប្បន្នភាពទីតាំងជនបរទេសចេញ-ចូលនិងស្នាក់នៅប្រមូលផ្តុំ ទូទាំងខេត្តកំពង់ស្ពឺ។ដើម្បីធ្វេីការជូនដំណឹង ផ្សព្វផ្សាយ អំពីអនុក្រឹត្យលេខ០៣ របស់រាជរដ្ឋាភិបាលនិងការចុះធ្វេីរដ្ឋបាលចំហត្រួតពិនិត្យតាម ទីតាំង សហគ្រាស ក្រុមហ៊ុន ផ្ទះសំណាក់ ផ្ទះជួល បុរី និងទីតាំងមានជនបរទេសស្នាក់នៅ លក្ខណៈប្រមូលផ្ដុំ និងទីតាំងទុកចោល ដោយមានការហាមឃាត់ចេញ-ចូល ជាពិសេសទីតាំងជនបរទេសចេញ-ចូល និងស្នាក់នៅ ជាលក្ខណៈប្រមូលផ្តុំ។
ការផ្សព្វផ្សាយដល់ម្ចាស់ទីតាំងសហគ្រាស ផ្ទះជួល ក្រុមហ៊ុន បុរី ផ្ទះសំណាក់ សណ្ឋាគារ ឃ្លាំងព័ទ្ធជិត ដេីម្បីសហការជាមួយម្ចាស់ទីតាំង ថាមិនត្រូវផ្ដល់ឬជួយសំរួលដល់ការយកទីតាំងជាកន្លែងលាក់ទុកសម្ភារៈប្រព្រឹត្ដបទល្មេីស ឬផ្ដល់ឲ្យការលួចធ្វេីសកម្មភាពខុសច្បាប់ ការបង្ខាំងមនុស្ស ការជួញដូរមនុស្ស ការលេងល្បែងខុសច្បាប់ និងជាមូលដ្ឋាន នៃក្រុមឧក្រឹដ្ឋជនប្រព្រឹត្ដបទល្មេីស ( ONLINE SCAMS ) ឡេីយ។ករណីនេះបេីសិនរកឃេីញ សមត្ថកិច្ចនឹងអនុវត្ដលេីការផាកពិន័យ លេីសពីនោះនិងរងទណ្ឌកម្មតាមច្បាប់ជាធរមាន៕
សូមបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកការឆបោកតាមប្រព័ន្ធបច្ចេកវិទ្យា គឺជាបញ្ហាតំបន់ និងសកលដែលមានលក្ខណៈស្មុគស្មាញ និងប្រទាក់ក្រឡាគ្នាហើយកម្ពុជាជាអ្នករងគ្រោះ និងត្រូវខូចឈ្មោះលើឆាកអន្តរជាតិ ដូច្នេះយុទ្ធនាការបង្រ្កាបការឆបោកតាមប្រព័ន្ធបច្ចេកវិទ្យាគឺជាឆន្ទៈពិតប្រាកដរបស់រាជរដ្ឋាភិបាលក្នុងការបោសសម្អាតផ្ទះរបស់ខ្លួនឱ្យបានស្អាតពីព្រោះបញ្ហានេះបានប៉ះពាល់ដល់មុខមាត់ប្រទេសជាតិ និងសេដ្ឋកិច្ចសង្គមកម្ពុជា។រាជរដ្ឋាភិបាលកម្ពុជា បានបង្ហាញឆន្ទៈយ៉ាងមុតមាំក្នុងការប្រយុទ្ធប្រឆាំង ការឆបោកតាមប្រព័ន្ធបច្ចេកវិទ្យានេះយ៉ាងម៉ឺងម៉ាត់ដោយមិនលើកលែង និងមិនថយក្រោយជាដាច់ខាត៕
