នាថ្ងៃចន្ទ៩រោច ខែបុស្ស ឆ្នាំម្សាញ់ សប្តស័ក ព.ស២៥៦៩ ត្រូវនឹងថ្ងៃទី១២ ខែមករា ឆ្នាំ២០២៦នេះ លោក សរ សុដានី អភិបាលរងខេត្តស្វាយរៀង តំណាងឯកឧត្តម ប៉េង ពោធិ៍សា អភិបាល នៃគណៈអភិបាលខេត្តបានអញ្ជើញចូលរួមជាគណៈអធិបតីក្នុងពិធីសម្ពោធដាក់ឱ្យដំណើការជាផ្លូវការចង្វាក់ផលិតកម្ម ផលិតសំបកកង់រថយន្តរបស់រោងចក្រ Wanli Tire Co., Ltd ផលិតសំបកកង់រថយន្តរបស់រោងចក្រ Wanli Tire Co., Ltd ស្ថិតក្នុងតំបន់សេដ្ឋកិច្ចពិសេសស៊ីនបាវិត ឃុំព្រៃគគីរ ស្រុកចន្រ្ទា ក្រោមអធិបតីភាពឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សា អភិវឌ្ឍន៍កម្ពុជា តំណាងដ៏ខ្ពង់ខ្ពស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ពិធីនេះក៏មានការអញ្ជើញចូលរួមពីឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តមអគ្គលេខាធិការគណៈកម្មាធិការវិនិយោគកម្ពុជា ឯកឧត្តមអគ្គលេខានៃអគ្គលេខាធិការរដ្ឋាន ក.អ.ក. ឯកឧត្តរដ្ឋលេខាធិការ ឯកឧត្តមអនុរដ្ឋលេខាធិការ ឯកឧត្តមអគ្គលេខាធិការរង លោកប្រធានក្រុមប្រឹក្សាភិបាលក្រុមហ៊ុន Guangzhou Industrial Investment Holding Group និងថ្នាក់ដឹកនាំក្រុមហ៊ុន Wanill Tire Co., Ltd ព្រមទាំងឯកឧត្តម លោក លោកស្រី ប្រធានមន្ទីរ អង្គភាពពាក់ព័ន្ធក្នុងខេត្តជាច្រើនរូបទៀត។
លោកអភិបាលរងខេត្តបានថ្លែងថា ក្នុងនាមឯកឧត្តម ប៉េង ពោធិ៍សា អភិបាលនៃគណៈអភិបាលខេត្ត សូមសម្តែងនូវការគោរពអរគុណយ៉ាងជ្រាលជ្រៅបំផុតចំពោះវត្តមានដ៏ខ្ពង់ខ្ពស់របស់ឯកឧត្តមឧបនាយករដ្ឋមន្ត្រី ដែលបានចំណាយពេលវេលាដ៏មានតម្លៃ និងមមាញឹកអញ្ជើញ ជាអធិបតីក្នុងពិធីនេះ នេះជាការបង្ហាញឲ្យឃើញពីការយកចិត្តទុកដាក់ ការលើកទឹកចិត្ត ការផ្តល់ តម្លៃ និងការគាំទ្រខ្ពស់បំផុតរបស់រាជរដ្ឋាភិបាលចំពោះការវិនិយោគរបស់វិស័យឯកជន ហើយ វត្តមានរបស់រោងចក្រផលិតសំបកកង់រថយន្ត Wanli Tire ដែលបានសម្ពោធដាក់ឱ្យដំណើការជាផ្លូវ ការចង្វាក់ផលិតកម្មនាថ្ងៃនេះ គឺជាសក្ខីភាពសរបញ្ជាក់ឲ្យឃើញពីមនុញ្ញផលដ៏ថ្លៃថ្លា ដែលកើត ចេញពីចំណងកិច្ចសហប្រតិបត្តិការដ៏រឹងមាំ រវាងប្រទេសទាំងពីរ កម្ពុជា-ចិន ។
លោកភិបាលរងបន្តថា ខេត្តស្វាយជាខេត្តមួយដែលទទួលបានផលវិជ្ជមានច្រើនពីបណ្តាដៃគូវិនិយោគនានា ដែលបានមកបណ្តាក់ទុនវិនិយោគក្នុងខេត្ត ពិសេសគឺមកពីប្រទេសចិន ហើយក្នុងនាមអាជ្ញាធរខេត្ត សូមសម្តែងនូវការស្វាគមន៍ និងថ្លែងអំណរគុណយ៉ាង ជ្រាលជ្រៅ ចំពោះថ្នាក់ដឹកនាំក្រុមហ៊ុន Wanli Tire ដែលបានសម្រេចចិត្តជ្រើសរើសខេត្តស្វាយរៀង សម្រាប់ការបណ្តាក់ទុនវិនិយោគលើការផលិតសំបកកង់រថយន្ត សម្រាប់ធ្វើការនាំចេញទៅ កាន់ទីផ្សារពិភពលោក ហើយយើងខ្ញុំសង្ឃឹមថានិងមានការលក់ចែកចាយនៅក្នុងស្រុកផងដែរដើម្បី អោយបងប្អូនប្រជាពលរដ្ឋកម្ពុជាបានស្គាល់និងបានប្រើប្រាស់សំបកកង់រថយន្តដែលមានគុណភាព ស្តង់ដាកម្រិតពិភពលោក Wanli Tire នេះផងដែរ ។
លោកអភិបាលរងបន្ថែមទៀតថា ការលេចឡើងជារូបរាងនូវរោងចក្រ Wanli Tire ពេលនេះគឺពុំមែនជាការចៃដន្យនោះទេ ប៉ុន្តែជាការកើតឡើងដោយឆ្លងកាត់នូវការសិក្សា ស្វែងយល់យ៉ាងស៊ីជម្រៅ ច្បាស់លាស់ និងប្រកបដោយចក្ខុវិស័យវែងឆ្ងាយរបស់ក្រុមហ៊ុន ក៏ដូចជាការបង្ហាញឲ្យឃើញយ៉ាងជាក់ច្បាស់អំពី ការផ្តល់សេចក្តីទុកចិត្ត របស់វិស័យឯកជនមកលើសក្តានុពលដែលមាននៅក្នុងមូលដ្ឋានខេត្ត ស្វាយរៀង ជាពិសេសជឿជាក់លើរាជរដ្ឋាភិបាល ក្រោមការដឹកនាំដ៏ខ្ពង់ខ្ពស់ ប្រកបដោយ គតិបណ្ឌិត និងមានចក្ខុវិស័យវែងឆ្ងាយច្បាស់លាស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជាអគ្គមគ្គុទ្ទេសដ៏ឆ្នើម និងពោរពេញដោយសមត្ថភាព ចំណេះដឹង និងថាមពល ។
