(ខេត្តកោះកុង)៖ ព្រឹកថ្ងៃទី៣១ ខែតុលា ឆ្នាំ២០២៣ រដ្ឋបាលខេត្តកោះកុង បានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកោះកុង លើកទី៥ អាណត្តិទី៣ ឆ្នាំ២០២៣ នៅក្រុងខេមរភូមិន្ទ ក្រោមអធិបតីភាពដ៏ខ្ពង់ខ្ពស់ឯកឧត្តម កាយ សំរួម ប្រធានក្រុមប្រឹក្សាខេត្តកោះកុង និងលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង។
ពិធីនោះដែរមានការអញ្ជើញចូលរួមពីសំណាក់ ឯកឧត្តម លោកជំទាវសមាជិកក្រុមប្រឹក្សាខេត្ត ,ឯកឧត្តម លោកជំទាវ លោក លោកស្រី អភិបាលរងខេត្ត ,ថ្នាក់ដឹកនាំមន្ទីរ-អង្គភាពជុំវិញខេត្ត កងកម្លាំងទាំងបី អាជ្ញាធរមូលដ្ឋាន រួមមាន៖ ក្រុមប្រឹក្សាស្រុក ,គណអភិបាលក្រុង ,ក្រុមប្រឹក្សាសង្កាត់ ,មេភូមិ និងមន្រ្តីរាជការ កងកម្លាំង ព្រមទាំងប្រជាពលរដ្ឋទាំង៣សង្កាត់។ ពិធីនោះរៀបចំធ្វើឡើងនៅបរិវេណសួនច្បារមុខវិទ្យាល័យកោះកុង ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
មានប្រសាសន៍ក្នុងវេទិកានេះឯកឧត្តម កាយ សំរួម ប្រធានក្រុមប្រឹក្សាខេត្តកោះកុង បានលើឡើងថា សុខទុក្ខក្តីកង្វល់របស់ប្រជាពលរដ្ឋ គឺជាសុខទុក្ខក្តីកង្វល់របស់អាជ្ញាធរដែនដី និងថ្នាក់ដឹកនាំដូចគ្នា ដូចនេះរដ្ឋបាលខេត្តបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនេះឡើង ដើម្បីអោយដឹងច្បាស់ពីសុខទុក្ខ និងផ្តល់ឱកាសដល់ក្រុមប្រឹក្សាគ្រប់ថ្នាក់ អ្នកពាក់ព័ន្ធ និងប្រជាពលរដ្ឋទាំងអស់អាចចូលរួមក្នុងការផ្តល់មតិយោបល់ចំពោះការអភិវឌ្ឍន៍មូលដ្ឋាន សមិទ្ធផល បញ្ហាប្រឈម និងទិសដៅអនុវត្តនាពេលខាងមុខរបស់រដ្ឋបាលខេត្ត ផ្តល់នូវអនុសាសន៍ និងសំណូមពរនានា សម្រាប់ការពិភាក្សា និងតាមរយ:ការឆ្លើយតបបានទាន់ពេលវេលាពីស្ថាប័នជំនាញ និងកម្លាំងសមត្ថកិច្ចពាក់ព័ន្ធ ដើម្បីឈានទៅធ្វើការកែលម្អ និងដោះស្រាយឲ្យកាន់តែល្អប្រសើរស្របទៅនឹងតម្រូវការជាអាទិភាព និងការកាត់បន្ថយភាពក្រីក្រជូនដល់ប្រជាពលរដ្ឋទូទៅគ្រប់មូលដ្ឋាន៕
