ម៉ោង១យប់រំលងអាធ្រាត្រលោកស្នងការដឹកនាំកម្លាំងចុះត្រួតពិនិត្យស្ថានភាពទឹកព្រែកថី និងស្ថានភាពតាមដងព្រែកក្នុងមូលដ្ឋានក្រុងតាខ្មៅ…..

ម៉ោង១យប់រំលងអាធ្រាត្រលោកស្នងការដឹកនាំកម្លាំងចុះត្រួតពិនិត្យស្ថានភាពទឹកព្រែកថី និងស្ថានភាពតាមដងព្រែកក្នុងមូលដ្ឋានក្រុងតាខ្មៅ…..

កណ្តាល៖ នៅវេលាម៉ោង១និង១០រំលងអធ្រាត្រថ្ងៃពុធ ទី១៨ ខែមករា ឆ្នាំ២០២៣ ក្រោមការដឹកនាំបញ្ជាផ្ទាល់ពីលោកអភិបាលខេត្តកណ្តាល, លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលរួមជាមួយមេបញ្ជាការកងម្លាំងប្រដាប់អាវុធ បណ្តាកងកម្លាំង និងអង្គភាពពាក់ព័ន្ធ បានបន្តការងារត្រួតពិនិត្យស្ថានភាពទឹកព្រែកថី និងស្ថានភាពតាមដងព្រែក ស្ថិតនៅភូមិព្រែកថីនិងភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្តាល។

គួរជម្រាបជូនថា ក្រសួងធនធានទឹកបានជូនដំណឹងពីស្ថានភាពធាតុអាកាស ចាប់ពីថ្ងៃទី១៨ ដល់ថ្ងៃទី២៤ ខែមករា, អាកាសធាតុចុះត្រជាក់ពីកម្រិតខ្សោយទៅបង្គួរ។

ជាមួយគ្នានោះមន្ទីរសាធារណការខេត្តកណ្ដាលក៏បានប្រកាសផ្អាកការធ្វើចរាចរចំពោះយានយន្តធន់ធ្ងន់៣ថ្ងៃ លើកំណាត់ផ្លូវ មួយចំនួន ក្នុង ខេត្តកណ្ដាល ខណ:ជំនន់ទឹកភ្លៀងខុសរដូវកំពុងហក់ឡើងខ្លាំងផងដែរ។

គួររំលឹកផងដែរថា កាលពីរសៀលថ្ងៃទី១៧ មករា លោក គង់ សោភ័ណ្ឌ អភិបាលខេត្តនិងជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល និងនាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ព្រមទាំងសហការី មន្ត្រីរាជការបានបានចុះចែកអំណោយដល់គ្រួសាររងគ្រោះដោយការបាក់ស្រុតដីតាមសណ្ដព្រែក ដោយជំនន់ទឹកភ្លៀងចំនួន៧៧គ្រួសារ ស្ថិតក្នុងភូមិព្រែកសំរោង និងភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាល ។

លោក គង់ សោភ័ណ្ឌ បានថ្លែងពីការសោកស្ដាយចំពោះការខូចខាតផ្ទះសំបែង និងទ្រព្យសម្បត្តិរបស់គ្រួសាររងគ្រោះ ដែលនេះជាគ្រោះមហន្តរាយបង្កដោយធម្មជាតិ គ្មាននរណាម្នាក់ចង់ជួបប្រទះឡើយ ជាពិសេស លោកក៏បាននាំមកនូវផ្តាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា និន្នាការនយោបាយណាមួយឡើយ។លោកបន្តថា ថ្វីត្បិតតែអំណោយមនុស្សធម៌ ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី មិនសមល្មមនឹងការខាតបង់របស់បងប្អូន តែក៏អាចជួយសម្រាលទុក្ខបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ជាប្រធាន ពោលគឺទីណាមានទុកលំបាកទីនោះមាន កាកបាទក្រហមកម្ពុជាចុះជួយ ដោយមិនមានការរើសអើងនោះឡើយ គ្រប់ទីកន្លែង គ្រប់ពេលវេលា ក្នុងសកម្មភាពមនុស្សធម៌។

លោកប្រធានគណៈកម្មាធិការសាខាបានបន្តថា ជំនន់ទឹកភ្លៀងនេះបណ្ដាលមកពី ភ្លៀងធ្លាក់ខ្លាំង ដែលបានរងការវាយប្រហារដល់ក្រុងច្បារមន ស្រុកឱរ៉ាល់ ស្រុកថ្ពង និងស្រុកភ្នំស្រួច ខេត្តកំពង់ស្ពឺ កាលពីថ្ងៃទី១២ ខែមករា ឆ្នាំ២០២៣កន្លងមក ដែលបណ្តាលឱ្យអាងស្តុកទឹកមួយចំនួន មានមានទឹកកើនឡើងទើបបណ្ដាលអោយអាងស្តុកទឹកស្វយ័តអន្លង់ជ្រៃ នៃស្រុកថ្ពងទឹកឡើងខ្ពស់ដល់កម្រិតប្រកាសអាសន្ន ទើបមន្ទីរជំនាញរួមជាមួយអោយអាជ្ញាធរបង្ខំចិត្តបើកទ្វារទឹកទាំង៥ ដើម្បីរំដោះទឹកបញ្ជៀសពីការហូរច្រោះធ្វើឲ្យបាក់ទំនប់ ជាយថាហេតុ ទើបធ្វើអោយភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាលរងការប៉ះពាល់ដោយជំនន់ទឹកភ្លៀងនេះ។

ទន្ទឹមនោះលោកក៏បានសំណូមពរដល់បងប្អូនប្រជាពលរដ្ឋដែលរស់នៅតាមមាត់ស្ទឹង ព្រែក សូមមានការប្រុងប្រយ័ត្នខ្ពស់ជាមួយសត្វអសិរពិសនានា ពិសេសចាស់ជរា កុមារតូចៗ មិនត្រូវឱ្យពួកគាត់នៅក្បែរមាត់ទឹក ឬលេងទឹកឡើយ ដែលអាចបង្កឱ្យកើតមានគ្រោះថ្នាក់ណាមួយកើតឡើងជាយថាហេតុ។

ចំពោះអំណោយមនុស្សធម៌របស់សាខាកាកបាទក្រហមកម្ពុជាខេត្តកណ្តាលដែលចែកជូនគ្រួសាររងគ្រោះ ក្នុងមួយគ្រួសារ ទទួលបាន៖ អង្ករ២៥ គីឡូក្រា មី ១កេស ទឹកស៊ីអ៊ីវ១យួរ ទឹកត្រី១យួរ ត្រីខ ២យួរ ទឹកសុទ្ធ ១កេស ម៉ាស ១ដុំ អាវរងា កៅស៊ូតង់ចំនួន១ និងថវិកា ២០ម៉ឺនរៀល៕