រាជធានីភ្នំពេញ ៖ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនកម្ពុជាបានមានប្រសាសន៍ថា ប្រទេសចិននៅតែឈរក្នុងលំដាប់លេខ១ ក្នុងការផ្តល់ប្រាក់កម្ចី និង ជំនួយក្នុងការកសាងហេដ្ឋារចនាសម្ព័ន្ធផ្លូវថ្នល់នៅកម្ពុជា។ យ៉ាងណាក៏ដោយ ឯកឧត្តមបានគូសបញ្ជាក់ថា កម្ពុជាមិនរើសអើងប្រភពថវិកាដែលផ្តល់ឱ្យ ក្នុងការអភិវឌ្ឍន៍វិស័យសាធារណការនោះទេ ប៉ុន្តែជំនួយនិងកម្ចីពីមិត្តចិនមិនចំណាយពេលយូរក្នុងការទទួលបាន ខុសពីប្រទេសផ្សេង។
ឆ្លើយតបទៅនឹងសំណួររបស់ប្រជាពលរដ្ឋនៅក្នុងកម្មវិធីផ្សាយផ្ទាល់របស់ក្រសួងសាធារណការនិងដឹកជញ្ជូន តាមរយៈបណ្តាញទំនាក់ទំនង សង្គម កាលពីថ្ងៃទី៣០ខែសីហាឆ្នាំ ២០១១ ឯកឧត្តមបានលើកឡើងថា ប្រទេសចិនគឺជាប្រទេសលំដាប់ទី១ដែលបានផ្តល់ប្រាក់កម្ចីជិត៣ ពាន់លានដុល្លារអាមេរិក សម្រាប់គាំទ្រដល់ការកសាងហេដ្ឋារចនាសម្ព័ន្ធផ្លូវថ្នល់នៅកម្ពុជា។ កម្ចី និង ជំនួយទាំងនេះ កម្ពុជាមិនអាចខ្វះបាន និង មិនអាចពន្យារពេលទទួលបាននោះទេ ព្រោះកម្ពុជាត្រូវការការអភិវឌ្ឍន៍។បើទោះជាទំហំនៃការទទួលកម្ចី និង ជំនួយពីចិនមានទំហំធំ យ៉ាងណាក្តី ក៏កម្ពុជាមិនរើសអើងប្រភពថវិកាដែលប្រទេស និង ដៃគូអភិវឌ្ឍន៍ចង់ផ្តល់ឱ្យកម្ពុជានោះទេ ដើម្បីធ្វើយ៉ាងណាចូលរួមការ អភិវឌ្ឍន៍ និង កសាងប្រទេសឱ្យកាន់តែរីកចម្រើន។
ជាមួយនឹងការបកស្រាយបែបនេះ ឯកឧត្តម ស៊ុន ចាន់ថុល បានលើកឡើងទៀតថា ចំពោះ ប្រាក់កម្ចី និង ជំនួយ ដែលបានផ្តល់ឱ្យកម្ពុជា ទាន់ពេលវេលាដើម្បីមកកសាងផ្លូវ ស្ពាននោះ កម្ពុជានឹងទទួល ដោយមិនរង់ចាំនោះទេ ខណៈកម្ចីនិងជំនួយពីប្រទេសខ្លះត្រូវការការសិក្សា ច្រើនឆ្នាំ ដែលកម្ពុជាមិនអាចរង់ចាំបាននោះឡើយ ។បើកម្ពុជារង់ចាំ៥ឆ្នាំទើបបានប្រាក់កម្ចីមកកសាង ផ្លូវ ឬ ស្ពាន គឺកម្ពុជាខាតបង់ច្រើន ណាស់ ។ ដូច្នេះកម្ពុជាមិនដែលបដិសេធប្រាក់កម្ចីមកពីប្រភពណានោះទេ។
ទាក់ទងនឹងកិច្ចសហប្រតិបត្តិការរវាងចិននិងកម្ពុជាលើវិស័យហេដ្ឋារចនាសម្ពន្ធនេះដែរ ឯកឧត្តមទេសរដ្ឋមន្ត្រី ស៊ុន ចាន់ថុល បានជម្រាប ជូនផងដែរថា វិទ្យាស្ថានតេជោសែនសាធារណការនិងដឹកជញ្ជូនឆ្នាំ ថ្មីៗនេះ បានចុះហត្ថលេខាលើអនុស្សរណៈយោគយល់ជាមួយ សាកលវិទ្យាល័យល្បីៗនៅប្រទេសចិន ដោយឯកឧត្តមសង្ឃឹមថា យុវជនកម្ពុជានឹងមានឱកាសបង្កើនចំណេះដឹងឱ្យបានគ្រប់ជ្រុងជ្រោយ និងមានឆន្ទៈរៀនខ្លួនឯង ដាក់ចិត្តដាក់កាយរៀនសូត្រឱ្យពូកែ ដើម្បីយកចំណេះដឹងលើវិស័យហេដ្ឋារចនាសម្ពន្ធនេះ ទៅបម្រើប្រទេសជាតិ មាតុភូមិ៕
