គណៈកម្មការចំពោះកិច្ចរបស់សហព័ន្ធកីឡាបាល់ទាត់កម្ពុជា (FFC) បានចុះពិនិត្យកីឡដ្ឋានធំ នៃពហុកីឡដ្ឋានជាតិមរតកតេជោ កាលពីល្ងាចថ្ងៃទី៣០ ខែសីហា ឆ្នាំ២០២១ ក្នុងបំណងសំខាន់ក្នុងការដាក់សំណើដេញថ្លៃធ្វើម្ចាស់ផ្ទះការប្រកួតAFF Suzuki Cup 2020 ដែលបានពន្យារពេលមកនាចុងឆ្នាំ២០២១។
លោកស្រី ពុធ ធីតា ប្រធានគណៈកម្មការចំពោះកិច្ច FFC បានដឹកនាំគណៈកម្មការនេះ ក្រោមការសម្របសម្រួលពីគណៈកម្មាធិការជាតិអូឡាំពិកកម្ពុជា ដើម្បីពិនិត្យនូវគ្រឿងបរិក្ខារ និងហេដ្ឋារចនាសម្ព័ន្ធនានា ក្នុងពហុកីឡដ្ឋានជាតិមរតកតេជោ ដើម្បីដាក់សំណើសុំធ្វើជាម្ចាស់ផ្ទះការប្រកួត AFF Suzuki Cup នេះ។ ដោយសារវិបត្តិជំងឺកូវីដ-១៩ ពានរង្វាន់តំបន់អាស៊ីអាគ្នេយ៍នេះត្រូវបានពន្យារពេលចំនួន២លើកហើយ និងតាមការគ្រោងទុក ព្រឹត្តិការណ៍នេះនឹងរៀបចំការប្រកួតពីថ្ងៃទី០៥ ខែធ្នូ ឆ្នាំ២០២១ ដល់ថ្ងៃទី០១ ខែមករា ឆ្នាំ២០២២ ដោយបេក្ខភាពមានបំណងចូលរួមដេញថ្លៃធ្វើម្ចាស់ការប្រកួត នាពេលនេះមានចំនួន៤ប្រទេស គឺកម្ពុជា សិង្ហបុរី ថៃ និងឥណ្ឌូណេស៊ី។
សូមបញ្ជាក់ថា នេះជាគម្រោងទទួលរៀបចំធ្វើជាម្ចាស់ផ្ទះការប្រកួតកីឡាបាល់ទាត់តំបន់អាស៊ីអាគ្នេយ៍របស់សហព័ន្ធកីឡាបាល់ទាត់កម្ពុជា ដើម្បីបង្ហាញពីហេដ្ឋារចនាសម្ព័ន្ធកីឡាថ្មី កិត្យានុភាពជាតិលើឆាកអន្តរជាតិ ក្នុងការត្រៀមខ្លួនរបស់វិស័យកីឡាបាល់ទាត់កម្ពុជា ត្រៀមឆ្ពោះទៅទទួលរៀបចំធ្វើជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ផងដែរ៕
