លោកជំទាវ ញ៉ែម សាខន ស ខេង ប្រធានកិត្តិយសក្រុមអ្នកម្ដាយមនុស្សធម៌ និងលោកជំទាវ កែ សួនសុភី ស សុខា ព្រមទាំងឯកឧត្តម ខាន់ ម៉ាណេរ

នាថ្ងៃព្រហស្បតិ៍ ៨រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែវិច្ឆិកា ឆ្នាំ២០២២នេះ លោកជំទាវ ញ៉ែម សាខន ស ខេង ប្រធានកិត្តិយសក្រុមអ្នកម្ដាយមនុស្សធម៌ និងលោកជំទាវ កែ សួនសុភី ស សុខា ព្រមទាំងឯកឧត្តម ខាន់ ម៉ាណេរ ប្រធានក្រុមក្រឡាហោមមនុស្សធម៌ តំណាងដ៏ខ្ពង់ខ្ពស់សម្ដេចក្រឡាហោម ស ខេង ឧបនាយករដ្ឋមន្រ្តី និងជាប្រធានក្រុមការងារចុះមូលដ្ឋានខេត្តបាត់ដំបង និងព្រៃវែង បានអញ្ជើញផ្ដល់អំណោយជូនប្រជាពលរដ្ឋនៅស្រុករុក្ខគីរី ខេត្តបាត់ដំបង ចំនួន២៥០គ្រួសារ។

ពិធីផ្ដល់អំណោយជូនប្រជាពលរដ្ឋខ្វះខាត និងរងផលប៉ះពាល់ដោយទឹកជំនន់ នៅស្រុករុក្ខគិរីនាឱកាសនោះ មានការអញ្ជើញចូលរួមពី ឯកឧត្តមអ្នកតំណាងរាស្រ្តមណ្ឌលបាត់ដំបង ឯឧត្តមប្រធានក្រុមប្រឹក្សា និងអភិបាល នៃគណៈអភិបាលខេត្ត ឯកឧត្តម លោកជំទាវ តំណាងក្រុមការងារនានា ព្រមទាំងលោក លោកស្រី ជាមន្រ្តីរាជការចំណុះរដ្ឋបាលខេត្តបាត់ដំបង រដ្ឋបាលស្រុករុក្ខគិរី និងអាជ្ញាធរមូលដ្ឋានជាច្រើនរូបទៀត។

អំណោយដែលបានផ្ដល់ជូនប្រជាពលរដ្ឋ រួមមាន ក្នុងមួយគ្រួសារៗទទួលបានអង្ករ ១ការ៉ុង ទឹកក្រូច១កេស មី១កេស ត្រីខ២យួរ ទឹកស៊ីអ៊ីវទឹកត្រី១យួរ ទឹកសុទ្ធ២យួរ ព្រមទាំងម៉ាស់ និងអាល់កុល។

នាឱកាសនោះដែរ ឯកឧត្តម ខាន់ ម៉ាណេរ បានជម្រាបជូនប្រជាពលរដ្ឋនូវសេចក្ដីផ្ដាំផ្ញើសួរសុខសុខទុក្ខ និងក្ដីនឹករម្លឹកពីសម្តេចតេជោ ហ៊ុន សែន នាយករដ្ឋមន្រ្តី និងសម្តេចក្រឡាហោម ឧបនាយករដ្ឋមន្រ្តី ជូនប្រជាពលរដ្ឋទាំងអស់នៅស្រុករុក្ខគីរី និងថ្លែងអំណរគុណប្រជាពលរដ្ឋដែលបានគាំទ្រការដឹកនាំរបស់រាជរដ្ឋាភិបាល ៕