(ភ្នំពេញ)÷ តំណាងអយ្យការអមសាលាដំបូងរាជធានីភ្នំពេញ នៅថ្ងៃទី៣១ ខែឧសភា ឆ្នាំ២០២៦ នេះ បានសម្រេចចោទប្រកាន់ជាផ្លូវការលើក្រុមជនសង្ស័យជាមន្ត្រីនគរបាល មន្ត្រីអាវុធហត្ថ និងអ្នកទទួលផលចោរកម្ម សរុបចំនួន ៥៤នាក់ បន្ទាប់ពីបានទទួលការផ្ទេរសំណុំរឿងដ៏ក្ដៅគគុកនេះពីតំណាងអយ្យការខេត្តកំពត។
ករណីបង្ក្រាបទ្រង់ទ្រាយធំនេះ បានធ្វើឡើងក្រោយពីមានការស៊ើបអង្កេតឃើញថា ក្រុមជនសង្ស័យបានគប់គិតគ្នាចូលលួចសម្ភារនៅក្នុងកាស៊ីណូមួយកន្លែង ស្ថិតនៅច្រកទ្វារព្រំដែនអន្តរជាតិព្រែកចាក ខេត្តកំពត ដែលជាកម្មសិទ្ធិរបស់អតីត ឧកញ៉ា លី គួង។
នៅក្នុងចំណោមជនសង្ស័យទាំង ៥៤នាក់នោះ មានការចូលរួមពីមន្ត្រីអនុវត្តច្បាប់លំដាប់ជាន់ខ្ពស់ និងមន្ត្រីមូលដ្ឋានជាច្រើនរូប រួមមាន៖
ស្នងការរង ទទួលផែនការងារព្រំដែន
អធិការនគរបាល ស្រុកកំពង់ត្រាច និងអធិការរង មេបញ្ជាការវរៈសេនាតូច នគរបាលការពារព្រំដែន មន្ត្រីកងរាជអាវុធហត្ថ ខេត្តកំពត ព្រមទាំងមន្ត្រីក្រោមឱវាទមួយចំនួន និងអ្នកទទួលផលចោរកម្មផងសរុប ៥៤ នាក់។
យោងតាមតំណាងអយ្យការអមសាលាដំបូងរាជធានីភ្នំពេញ ក្រុមជនសង្ស័យទាំងអស់ត្រូវបានចោទប្រកាន់ពីបទល្មើសធ្ងន់ធ្ងរជាច្រើនករណី ទៅតាមទម្រង់នៃការចូលរួមរៀងៗខ្លួន រួមមាន៖
1.បទផ្ដើមគំនិត និងសមគំនិត ក្នុងបទលួចមានស្ថានទម្ងន់ទោស
2. បទលួចមានស្ថានទម្ងន់ទោស
3. បទលុបបំបាត់ភស្តុតាង
4. បទទទួលផលចោរកម្ម
ការចោទប្រកាន់នេះ គឺផ្អែកទៅតាមបញ្ញត្តិមាត្រា ២៨, មាត្រា ២៩, មាត្រា ៣៥៣, មាត្រា ៣៥៧, មាត្រា ៣៩៩, មាត្រា ៤០០ និងមាត្រា ៥៣៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា។
តាមប្រភពព័ត៌មានបានឱ្យដឹងថា ក្រុមជនសង្ស័យបានធ្វើសកម្មភាពលួចយកសម្ភារបច្ចេកវិទ្យា និងវត្ថុមានតម្លៃជាច្រើនពីក្នុងកាស៊ីណូ រួមមាន៖ ទូរស័ព្ទដៃ កុំព្យូទ័រ ព្រមទាំងសម្ភារមានតម្លៃជាច្រើនសន្ធឹកសន្ធាប់ ផ្សេងទៀតដែលគិតជាទឹកប្រាក់សរុបសរុបរាប់ម៉ឺនដុល្លារអាមេរិក។
បច្ចុប្បន្ន សំណុំរឿងនេះកំពុងស្ថិតក្នុងដៃចៅក្រមស៊ើបសួរ ដើម្បីបន្តនីតិវិធីច្បាប់យ៉ាងម៉ឺងម៉ាត់បំផុត។
ពីខ្ញុំបាទ÷ខាន់ វណ្ណី
ព័ត៌មានលម្អិតបន្ថែមជុំវិញចំណាត់ការបន្ត នឹងមានផ្សាយជូននៅពេលក្រោយ។
រូបភាពប្រភព÷ស្នងការដ្ឋាននគរបាលខេត្តកំពត
