ក្រុមឈ្មួញឈើធំៗ នៅតែធ្វើសកម្មភាពបំផ្លិចបំផ្លាញ ធនធានធម្មជាតិ និង គៀងគរ ប្រជាពលរដ្ឋ ឲ្យចូលព្រៃ ទៅកាប់ ផ្តួល បំផ្លាញ ដើមឈើ ធំៗ ចេញពី តំបន់ព្រៃភ្នំក្នុងតំបន់ដែន ជំរកសត្វព្រៃ ដើម្បីកាប់អារពុះ ជ្រៀកឈើ មានទាំងឈើក្រហម និង ឈើឃ្លុំ ដែលមានមុខកាត់ធំៗរួចធ្វើសកម្មភាព ដឹកចេញតាមរថយន្តឆ្លងកាត់តាមច្រកទ្វា ដាក់ដាំ ឆ្លងដែន ទៅលក់នៅប្រទេសវៀតណាម យ៉ាងរលូន

តាមប្រភព បានបង្ហើបឱ្យដឹងថាឈ្មួញឈើធំៗនោះ មាន បុគ្គល ពីរ នាក់ ១. ឈ្មោះ រិទ្ធ និង ២. ឈ្មោះ ភារម្យ និង បក្ខពួកមួយចំនួនទៀត កំពុងតែព្យាយាមរត់ការអស់រយ:ពេលជាង កន្លះខែមកហើយ ជាមួយនឹងកម្លាំងជំនាញពាក់ព័ន្ធដើម្បីដឹកឈើចេញពី ស្រុកពេជ្រាដា តាមរថយន្តធុនដ្រា និងចេញពីស្រុកកោះញ៉ែកតាមរថយន្តបែនធំៗតាមច្រកទ្វាដាក់ដាំ ឆ្លងដែន ឆ្ពោះទៅកាន់ប្រទេសវៀតណាម ក៏ប៉ុន្តែ គម្រោង ការដឹកជញ្ជូន ឈើចេញនោះមិនទាន់បានសម្រេចទេ ដោយដឹងថាមានមន្ត្រីជំនាញម្នាក់មិនទទួលសំណូកពីពួក ឈ្មួញ ទាំងនោះទាល់តែសោះ ។

ប្រជាពលរដ្ឋនៅក្នុងស្រុកពេជ្រា ដា និង ស្រុកកោះញែក បន្តលើកឡើងថា ដោយសារតែភាពធូររលុង នឹង មានការឃុបឃិតគ្នាប្រព្រឹត្ត អំពើពុករលួយជាពិសេសទៀតនោះ គឺ ចូលរួមបើកដៃ ដើម្បីទទួលបានលាភសក្ការៈផ្ទាល់ខ្លួនដែលកន្លងមក ធ្វើអោយក្រុមឈ្មួញដុះស្លែ ទាំងនេះមានខ្នងបង្អែកដ៏រឹងមាំ ក្នុងនោះក៏មានមន្ត្រីបរិស្ថាន បើកដៃអោយមានការកាប់បំផ្លាញព្រៃឈើក្នុងតំបន់ព្រៃភ្នំនិងដែន ជម្រក សត្វព្រៃក្នុងស្រុកពេជ្រា ដា និង ស្រុកកោះញ៉ែក ខេត្តមណ្ឌលគិរី ។

ជាក់ស្ដែងគិតត្រឹមយប់ថ្ងៃទី ១១/១២ ខែកក្កដា ឆ្នាំ២០២២ ដោយឈ្មោះ រិទ្ធ និង ឈ្មោះ ភារម្យ ខិតខំប្រឹងប្រែងរត់ការអស់រយៈពេល ជាងកន្លះខែមកហើយ ទើបអាជីវកម្មដឹកជញ្ជូន បទល្មើសព្រៃឈើរបស់ពួកគេអាចដឹកឆ្លងដែន ឆ្ពោះទៅកាន់ប្រទេស វៀតណាម បាន ដោយ រលូន ។

លោកបន្តថា ជារឿយៗលោកក៏បាននាំជនសង្ស័យទៅតុលាការផងដែរ ហើយលោកក៏មិនបានស្គាល់ឈ្មោះរិទ្ធ និងឈ្មោះភារម្យ ដែលជាឈ្មួញឈើធំៗនោះនៅទីណាដែរ គ្រាន់តែលោកធ្លាប់លឺតែឈ្មោះប៉ុណ្ណោះ មានតែអាជ្ញាធរក្នុងមូលដ្ឋានទេដែលស្គាល់បុគ្គលនោះ ព្រោះខាងលោកដឹងតែការពារព្រៃឈើតែប៉ុណ្ណោះ។

ចំណែកឯកឧត្តម ឡោ សុខា ស្នងការខេត្តមណ្ឌលគីរីវិញ អង្គភាពសារព័ត៌មានណាញធីវីយើងបានព្យាយាមទាក់ទងតាមរយៈលេខទូរស័ព្ទតែកំពុងជាប់រវល់  ហើយអង្គភាពយើងខ្ញុំរងចាំការបំភ្លឺគ្រប់ភាគីពាក់ព័ន្ធទាំងអស់ ដែលចង់បកស្រាយ។

គួរបញ្ជាក់ថា ក្រុមឈ្មួញឈើនេះក៏កំពុងត្រៀមរថយន្តប្រមាណជាង ៣០ទៅ ៤០គ្រឿង ដើម្បី សម្រុកដឹកឈើប្រភេទ ផ្ចឹក ស្រឡៅ សុក្រំ និង កកោះ ដែលជាប្រភេទឈើកំពុងត្រូវប៉ាន់ និង ដឹកឆ្លងដែនទៅ លក់នៅ ប្រទេសវៀតណាម តាមច្រកទ្វារ ដាក់ដាំផងដែរ ។

ពលរដ្ឋដែលរស់នៅក្នុងតំបន់មូលដ្ឋានខាងលើនេះបានបង្ហើបថា បើសិនជាមិនមានកាបើកភ្លើង ខៀវពីសំណាក់ អាជ្ញាធរពាក់ព័ន្ធ ជាពិសេសមន្ត្រី ច្រកទ្វាដាក់ដាំ នោះទេ ពិតណាស់ ក្រុមឈ្មួញឈើមិនអាចដឹកជញ្ជូនបទល្មើសឆ្លងដែនទៅប្រទេសវៀតណាមបាន នោះទេ  ហើយពលរដ្ឋនិងអង្គភាពសារព័ត៌មានណាញធីវីក៏កំពុងរងចាំមើលថា តើអាជ្ញាធរនិងមន្ត្រីពាក់ព័ន្ធមានវិធានការយ៉ាងណាចំពោះបុគ្គលខាងលើ៕