ខេត្តកណ្តាល៖ នៅព្រឹកថ្ងៃទី២៧ ខែមិនា ឆ្នាំ២០២៤នេះ មន្ទីរព័ត៌មានខេត្តកណ្តាល បានបើកកិច្ចប្រជុំពិនិត្យវឌ្ឍនភាពការងារព័ត៌មាន និងសោទស្សន៍ ដោយមានការចូលរួមពី លោក អ៊ុក កំពូល អគ្គនាយករង នៃអគ្គនាយកដ្ឋានព័ត៌មាន និងសោតទស្សន៍ លោក ចាប វន្នី ប្រធានមន្ទីរព័ត៌មានខេត្ដកណ្តាល លោក-លោកស្រី អនុប្រធានមន្ទីរ ព្រមទាំងការិយាល័យពាក់ព័ន្ធផងដែរ។
ក្នុងកិច្ចប្រជុំនេះ លោក អ៊ុក កំពូល បានមានប្រសាសន៍ថា កិច្ចប្រជុំនេះធ្វើឡើង ក្នុងគោលបំណងសំខាន់ គឺដើម្បីរួមគ្នាពិភាក្សា កែលម្អ ផ្លាស់ប្ដូរមតិយោបល និងពិនិត្យដោះស្រាយទៅលើបញ្ហាប្រឈមនានាដែលជួបប្រទះក្នុងការអនុវត្តការងារកន្លងមក សំដៅដោះស្រាយឱ្យអស់នូវរាល់បញ្ហាប្រឈមទាំងឡាយណាដែលកើតមានឡើងប្រកបដោយប្រសិទ្ធភាព និងទាន់ពេលវេលា។
លោកអគ្គនាយករង បានវាយតម្លៃខ្ពស់ចំពោះ ថ្នាក់ដឹកនាំគ្រប់លំដាប់ថ្នាក់ និងមន្ត្រីរបស់មន្ទីរព័ត៌មានខេត្តកណ្ដាលទាំងអស់ ដែលបានខិតខំបំពេញតួនាទី បានយ៉ាងល្អប្រសើរ ព្រមទាំងទទួលបានលទ្ធផលផ្លែផ្កាគួរជាទីមោទនៈ ជាពិសេសគឺបំពេញការងារបានយ៉ាងល្អប្រសើរក្នុងការងារប្រឆាំងព័ត៌មានក្លែងក្លាយ ការគ្រប់គ្រងលើផ្ទាំងយីហោ អាហ្វីស ប៉ាណូ ការគ្រប់គ្រងអង្គភាពសារព័ត៌មានក្នុងខេត្ត ជាងនេះទៅទៀតនោះគឺមន្ទីរតែងតែរាយការណ៍ និងផ្តល់ព័ត៌មានជូនក្រសួងបានលឿន និងទៀងទាត់ជាប្រចាំ។
បន្ថែមពីលើនេះ លោកលោកអគ្គនាយករង ក៏បានធ្វើការលើកទឹកចិត្តដល់មន្ត្រី នៃមន្ទីរព័ត៌មានខេត្តកណ្ដាលទាំងអស់ ត្រូវបន្តពង្រឹងសមត្ថភាព និងបំពេញតួនាទីរបស់ខ្លួនអោយបានល្អថែមទៀត ដើម្បីធ្វើឱ្យការអនុវត្តការងារប្រកបដោយគុណភាព ប្រសិទ្ធភាព ឈានឆ្ពោះទៅរកគោលដៅ ប្រកបដោយនិរន្តរភាព និងមាននវានុវត្តន៍បានល្អប្រសើរ។
ក្នុងកិច្ចប្រជុំនេះដែរ លោក ចាប វន្នី ប្រធានមន្ទីរព័ត៌មានខេត្ដកណ្តាល បានធ្វើការរាយការណ៍អំពីសកម្មភាពការងារពាក់ព័ន្ធនឹងការងារព័ត៌មាន និងសោតទស្សន៍ ដែលមន្ទីរបានសម្រេចបាននាពេលកន្លងមក ព្រមទាំងបានលើកឡើងនូវបញ្ហាប្រឈម ក៏ដូចជាសំណូមពរនានាជូនដល់ថ្នាក់ដឹកនាំក្រសួង ដើម្បីជួយធ្វើការដោះស្រាយឱ្យបានទាន់ពេលវេលា។
លោកប្រធានមន្ទីរព័ត៌មានខេត្ដកណ្តាល បានឱ្យដឹងដែរថា គិតត្រឹមខែមីនានេះ ខេត្តកណ្តាលមានអង្គភាពសារព័ត៌ដែលមានស្នាក់ការក្នុងខេត្ត សរុបចំនួន ១៣៥អង្គភាព មានស្ថានីវិទ្យុចំនួន២ និងស្ថានីយ៍ទូរទស្សន៍ខ្សែកាបចំនួន ១។ ចំពោះលទ្ធផលសម្រេចបានរយៈពេល ៣ខែនេះ មន្ទីរបានផ្ដល់សេវាតាមរយៈអង្គភាពច្រកចេញចូលតែមួយខេត្ត បានចំនួន ១៧៩ច្បាប់ ក្នុងនោះគេហទំព័រ ១១ ប៉ាណូ ១៤៦ កាសែត ១ និងអាហ្វីសចំនួន ២១។
