រាជធានីភ្នំពេញ ៖ ប្រទេសកូរ៉េបានផ្ដល់ថវិកាជំនួយជិត៨លានដុល្លារ ក្នុងការសាងសង់មជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា ដើម្បីផ្សារភ្ជាប់វិស័យអប់រំទៅនឹងវិស័យឧស្សាហកម្មនៅកម្ពុជា។
ក្នុងឱកាសប្រារព្ធពិធីបញ្ចុះបឋមសិលាសាងសង់មជ្ឈ មណ្ឌលជាតិបណ្តុះធុរកិច្ចថ្មីនៃកម្ពុជា នៅថ្ងៃទី៣ ខែកញ្ញា ឆ្នាំ ២០២១ ឯកឧត្តមបណ្ឌិត សភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា បានមានប្រសាសន៍ថា ក្នុងអំឡុងពេល៥ឆ្នាំចុង ក្រោយនេះ សាកលវិទ្យាល័យភូមិន្ទភ្នំពេញ មានកិច្ចសហ ការ និងកិច្ចសហប្រតិបត្តិការជាមួយដៃគូជាច្រើន ហើយនេះគឺជាគម្រោងមួយផងដែរ ដែលគាំទ្រដោយរដ្ឋាភិបាលកូរ៉េ (តំណាងដោយទីភ្នាក់ងារសហប្រតិបត្តិការអន្តរជាតិកូរ៉េ ហៅកាត់ជាថា KOICA) សម្រាប់ការបង្កើតប្រព័ន្ធបណ្តុះធុរកិច្ចថ្មីរវាងសាកលវិទ្យាល័យនិងឧស្សាហកម្មនៅកម្ពុជាដោយមានថវិកាសរុបជិត ៨ លានដុល្លារ។
ឯកឧត្តមរដ្ឋមន្ត្រីបានលើក ឡើងថា មជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា ត្រូវបានរៀបចំឡើងសមស្របទៅតាមពេលវេលាមួយដ៏ល្អ ហើយមជ្ឈមណ្ឌលខាងលើនេះ គឺជាធាតុផ្សំដ៏សំខាន់ក្នុងការគាំទ្រដល់ភាពជាសហ គ្រិននិងប្រព័ន្ធអេកូឡូស៊ី សំរាប់ធុរកិច្ចថ្មី នៅកម្ពុជា។
លោក រ៉ូ ហ្យុនជន (Rho Hyunjun) នាយក KOICA ប្រចាំប្រទេសកម្ពុជា បានបញ្ជាក់ថា គោលបំណងសំខាន់ៗចំនួន៤នៃគម្រោងបង្កើតមជ្ឈមណ្ឌលនេះគឺ៖១.បង្កើតគំរូបណ្តុះអាជីវកម្មនិងបណ្តាញទីផ្សារនៅកម្ពុជា ២. គាំទ្រដល់មូលដ្ឋានគ្រឹះ នៃកំណើនសេដ្ឋកិច្ចនិងការអភិវឌ្ឍសហគ្រិនភាពវ័យក្មេងនៅកម្ពុជា ៣. ធ្វើពិពិធកម្មឧស្សាហកម្ម និងជំរុញឧស្សាហកម្ម នៃបច្ចេកវិទ្យា ព័ត៌មាននិងទំនាក់ទំនង នៅកម្ពុជា និង៤. ដើម្បីភ្ជាប់និងបំពេញចន្លោះ រវាងសមត្ថភាពសិក្សា និងតម្រូវការទីផ្សារក្នុងប្រទេស ។
ក្នុងនោះដែរ ឯកឧត្តមបណ្ឌិត ជេត ជាលី សាកលវិទ្យាធិការនៃសាកលវិទ្យា ល័យភូមិន្ទភ្នំពេញ បានមាន ប្រសាសន៍ថា មជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា (NICC) មានទំហំប្រហែល ២២០០ម៉ែត្រការ៉េ ដែលមានកំពស់៣ជាន់ ដោយមានបន្ទប់ប្រជុំ ការិយាល័យ ការិយាល័យការងាររួម និងបន្ទប់រៀនជាដើម។ ឯកឧត្តមបណ្ឌិត បានបន្ដថា មជ្ឍមណ្ឌលនេះ នឹងបង្កើតនូវបរិយាកាសល្អសម្រាប់ សហគ្រិន អ្នកចាប់ផ្តើមធុរកិច្ចថ្មី អ្នកស្រាវជ្រាវ និស្សិត ក្រុមហ៊ុនឧស្សាហកម្ម និងមន្ត្រីរដ្ឋាភិបាល ដើម្បីជួប ពិភាក្សាគ្នា និងដើម្បីបង្កើតនូវ ដំណោះស្រាយ ប្រកបដោយភាពច្នៃប្រឌិត សម្រាប់សង្គម ជាតិប្រទេសកម្ពុជាយើង៕
