សមត្ថកិច្ច ក្រសួងមហាផ្ទៃ ឃាត់ខ្លួនស្ត្រី ជាមន្ត្រីនគរបាលម្នាក់ ពាក់ព័ន្ធនឹងករណីឆបោកលុយជិត ២០ មុឺនដុល្លា
ស្ត្រីម្នាក់ជាមន្រ្តីនគរបាល ឈ្មោះ ធូក ចិន្តា ត្រូវបានកម្លាំងនាយកដ្ឋាន នគរបាលព្រហ្មទណ្ឌនៃក្រសួងមហាផ្ទៃ ធ្វើការឃាត់ខ្លួន កាលពីថ្ងៃទី១៥ ខែធ្នូ ឆ្នាំ២០២២ ម្សិលមិញ។
តាមប្រភពព័ត៌មានបានឱ្យដឹងថា៖ មូលហេតុរហូតឈានទៅដល់ការឃាត់ខ្លួនស្ត្រីម្នាក់ដែលជាមន្ត្រីនគរបាល គឺមានពាក្យបណ្តឹងពីប្រជាពលរដ្ឋជាច្រើនគ្រូសារ រស់នៅឃុំបឹងគ្រំ ស្រុកល្វាឯម ខេត្តកណ្ដាល ប្តឹងពីករណីឆបោកលុយ។
ប្រភពដដែលបានបញ្ជាក់ឱ្យដឹងថា៖ ស្ត្រីជាមន្ត្រីនគរបាលឈ្មោះ ធូក ចិន្តា បានខ្ចីលុយពីប្រជាពលរដ្ឋចំនួន ១៨ គ្រួសារ ដោយក្នុង ១គ្រួសារ ចាប់ពីរាប់ពាន់ដុល្លាអាមេរិក អ្នកខ្លះទៀតដល់រាប់មុឺនដុល្លាអាមេរិកថែមទៀតក៏មាន។
ករណីឃាត់ខ្លួនស្ត្រី នគរបាលម្នាក់ខាងលើនេះ ខាងសារព័ត៌មានយើងក៏ទទួលបានព័ត៌មានដែរថា កម្លាំងសមត្ថកិច្ច នៃក្រសួងមហាផ្ទៃបានកំពុងត្រៀម បញ្ជូន ស្ត្រីដែលជាជនសង្ស័យខាងលើ ទៅកាន់អយ្យការអមសាលាដំបូងខេត្តកណ្តាល នៅថ្ងៃទី១៦ ខែធ្នូ ឆ្នាំ២០២២ នេះ ។
ហើយករណីខាងលើនេះ ក៏មានលេចឮដំណឹងថា កំពុងតែមានការអន្តរាគមន៍ ពីសំណាក់ អ្នកធំម្នាក់ដែលមានមុខមាត់ ដើម្បីឱ្យដោះ លែងជនសង្ស័យខាងលើនេះផងដែរ។
ចំណែកឯប្រជាពលរដ្ឋជាច្រើនគ្រួសារ ដែលត្រូវបាន ស្ត្រីជាមន្ត្រីនគរបាល ខ្ចីលុយ មិនព្រមសង កំពុងតែមានការព្រួយបារម្ភយ៉ាងខ្លាំង ជុំវិញលេចឮដំណឹងថាមានអ្នកធំចេញមុខជួយអន្តរាគមន៍ឱ្យដោះលែងជនសង្ស័យខាងលើ៕
